Шавкат Мирзиёев Саудияда бўлиб турган Ўзбекистон муфтийси билан гаплашди

Шавкат Мирзиёев 31 май куни Ўзбекистон мусулмонлари идораси раиси, муфтий шайх Нуриддин Холиқназар билан телефон орқали мулоқот қилди, деб хабар бермоқда президент матбуот хизмати.

Давлат раҳбари Ҳаж зиёратига кетган ватандошларга яратилган шароитлар, нуронийларнинг саломатлиги ва кайфияти ҳақида сўради, дейилади хабарда. Муфтий Ҳаж амалларини адо этиш учун барча ташкилий чоралар кўрилганини таъкидлади.

«Мен зиёратчиларимизнинг қандай кутиб олинганини телевизорларда кўрдим, бу ўзбек халқига бўлган жуда катта эҳтиромдир… Ҳожиларимиз Ўзбекистонга қайтгач, улар тинчлик ва маънавиятимизнинг тарғиботчилари бўлади деган умиддаман. Оилаларингиз бағрига эсон-омон қайтиб келишингизга тилакдошман», — деди у.

Айни пайтда 15 минг кишининг барчаси Саудия Арабистонига етиб борган. Уларга 300 дан ошиқ гуруҳ раҳбари, 50 нафар олий тоифали шифокор, 10 дан зиёд ошпазлар ва бошқа мутахассислар ҳамроҳлик қилмоқда.

Бу йил, Ўзбекистон томонининг талабига мувофиқ, Арафот ҳудудидаги чодирлар ёпиқ тарзда барпо этилган. Уларнинг атрофи иссиқ ўтказмайдиган панеллар билан ўралган, совитиш тизими ўрнатилган, гилам ва тўшаклар солинган.

Президент барча зиёратчиларга салом йўллаб, юртга соғ-омон келишларини тилади.