«Лопесга кўрсатган бағрикенглигимизни диндор аёлларимизга ҳам кўрсатайлик». Алишер Қодиров паспорт учун рўмолни ечиб тушишга мажбурлашни тўхтатишга чақирди
Унинг қайд этишича, Ўзбекистоннинг дунёвий давлат экани тортишиладиган мавзу эмас.
«Дунёвий давлат кўпчилик сайлаган парламент томонидан қабул қилиниб, кўпчилик сайлаган президент томонидан мақулланган қонунларни бузмаган ҳолда, ўзи истаганидек яшаш имконини беради», — дейди у.
«Ватанимизда барча миллат ва дунёқарашдаги ватандошлар эмин-эркин, қонунларни бузмаган ҳолда фаровонликка интилиши учун шароит яратиш устувор мақсад экани мустаҳкам белгиланган. Ҳамма тенг ва ҳеч ким камситилмаслиги кафолатланган».
Қодировнинг таъкидлашича, агар бирон ватандош пиво ичмоқчи бўлса, ичади, бу — унинг танлови, ичмайдиган ватандош ичмайди ва бунинг сабабини ҳар икки тоифа ҳеч кимга изоҳ беришга мажбур эмас.
«Алкоголни ичиш мумкин, лекин реклама қилиш мумкинмас, бу амалдаги қонунда белгиланган, албатта, парламент сайловларини мутлақо ютадиган бирон сиёсий куч қонунни ўзгартириб алкоголни „миллий қадрият“, бир жинслиларни оила қуриш талабини эса эркин танлов сифатида норма қилиши ҳам мумкин, бунга сиз ҳуқуқ берасиз…», — деди партия етакчиси.
Қодиров, ўз навбатида, «Миллий тикланиш» ҳар қандай тараққиётнинг қадриятларга таяниши керак деган ғоясида мустаҳкамлигини эслатиб ўтди.
Женнифер Лопеснинг концерти сердаромад иш ва ёпиқ тадбир, наркотика тарқатиб, давлатга қарши тарғибот қилмаса, ўтказади, танасини кўрсатиш — уни танлови, кўриш эса тадбирга билет олганларники, дунёвийлик шу!" — деди у.
«Лекин худди шундай, ўраниб юрмоқчи бўлган аёл ватандошнинг ҳам танлови қонун билан ҳимоя қилинган. Яланғоч намойишни дунёвийлик деб қабул қилдик, энди ёпиниб юриш ҳуқуқига ҳам дахл қилмаслик кераклигини қабул қилайлик. Лопесга қандай кийинишни ўргатмаганимиздек эътиқодли аёлларимизга рўмолни қандай ўрашни ўргатишни, қолаверса, шу ёшга келиб эътиқоди талабига риоя қилган аёлларни паспортга рўмолини ечиб тушишга мажбурлашни ҳам тўхтатиш керак. Идентификация талаблари юзнинг очиқ бўлишини тақозо қилади, сочнинг эмас. Лопесга кўрсатган бағрикенглигимизни диндор аёлларимизга ҳам кўрсатайлик», — деди Қодиров.
Дунёвийлик ишонганга ҳам, ишонмаганга ҳам тенг бўла олиш дегани, зўрнинг заифга ҳаётдан дарс бериши эмас. Лопес рақсини тушуниш учун Маркеснинг дунё фалсафасини ўқиган бўлиш керак, деб фикрини якунлади у.
Жаҳон суперюлдузи Женнифер Лопес 7 август куни Ўзбекистонда илк бор концерт берди. Концерт Up All Night — Live in 2025 жаҳон турнеси доирасида «Бунёдкор» стадионида ташкил этилди.