Феруза Хамидова геология вазирининг биринчи ўринбосари этиб тайинланди

Тоғ-кон саноати ва геология вазирлигида кадрлар ўзгариши содир бўлди, деб хабар қилди ташкилот матбуот хизмати.

Вазир Бобир Исламов 5 сентябрь куни бўлиб ўтган видеоселектор йиғилишида Феруза Рустамовна Хамидова тоғ-кон саноати ва геология вазирининг биринчи ўринбосари лавозимига тайинланганини маълум қилди.

Вазирлик сайтида Феруза Хамидованинг таржимаи ҳоли ва касбий тажрибаси ҳақида расмий маълумот йўқ. Шуниси маълумки, у Тошкент молия институти битирувчиси (2000). У бунгача Олмалиқ кон-металлургия комбинати (ОКМК)нинг Тошкент шаҳридаги ваколатхонасини бошқарган ва ОКМК бошқаруви раисининг иқтисодиёт ва молия бўйича ўринбосари лавозимида ишлаган.

Шунингдек, у «Ўзсаноатқурилишбанк» (SQB) Кузатув кенгаши аъзоси бўлган ва кредит операциялари департаментини бошқарган.

Хамидова Москва пўлат ва қотишмалар институтининг Олмалиқ филиалида дарс берган.

Омонулла Насритдинходжаев. Фото: Тошкент инвестиция форуми

Шу билан бирга, Омонулла Забихуллаевич Насритдинходжаев «бошқа ишга ўтиши муносабати билан» вазирнинг биринчи ўринбосари лавозимидан озод этилди. Унинг профили Геология вазирлиги сайтидаги «раҳбарият» бўлимидан йўқолди.

Spot’нинг эътибор қаратишича, Насритдинходжаев LinkedIn’да вазирликдаги фаолиятини сентябрь ойида тугатганини маълум қилган. Унинг янги иш жойи ҳақида ҳозирча маълумот берилмаган.

Омонулла Насритдинходжаев 2023 йил февралидан буён геология вазирининг биринчи ўринбосари лавозимида ишлаб келаётган эди. Бунгача у уч йилдан ортиқ вақт давомида молия вазирининг биринчи ўринбосари лавозимида ишлаган.