Лавозимини тарк этаётган Нью Йорк мэри Тошкентга келиб, пойтахт ҳокими билан музокаралар олиб борди

Лавозимини тарк этаётган Нью Йорк мэри Эрик Адамс Тошкентга ташриф буюрмоқда. Кеча у пойтахт ҳокими Шавкат Умурзоқов билан учрашди.

Пойтахт ҳокимлиги матбуот хизматининг хабар беришича, томонлар «мегаполисларни ривожлантиришнинг долзарб масалаларини муҳокама қилди, шаҳар инфратузилмасини модернизация қилиш бўйича тажриба алмашдилар, шунингдек, Тошкент ва Нью Йорк ўртасидаги ҳамкорликнинг истиқболли йўналишларини кўриб чиқди».

Шаҳар ҳокими Нью Йорк делегациясини Тошкентни 2030 йилгача ривожлантириш стратегиясининг асосий йўналишлари билан таништирди.

«Йирик шаҳарсозлик ва инвестиция лойиҳалари — „Янги Тошкент“, „Янги авлод“ саноат зонасини барпо этиш ва янги жамоат жойларини ривожлантириш лойиҳалари тақдим этилди», — дейилади хабарда.

Пойтахтда транспорт тизими, логистика, уй-жой коммунал хўжалиги соҳасидаги ўзгаришлар алоҳида муҳокама қилинди. Бундан ташқари, Marriott, Wendy’с, Pepsi (АҚШ), DP World (БАА), VEOLIA (Франция) ва бошқа халқаро компаниялар билан ҳамкорликда амалга оширилаётган лойиҳалар тақдим этилди.

«Нью Йорк мэри Ўзбекистондаги ўзгаришлар суръатини юқори баҳолади ва президент Шавкат Мирзиёев раҳбарлигида амалга оширилаётган ўзгаришлар кўламидан ҳайратда эканлигини билдирди. У Ўзбекистон пойтахтининг ривожланиши тўғри йўналишда бораётганини ва халқаро алоқаларни мустаҳкамлаш учун янги имкониятлар очаётганини таъкидлади», — дейилади хабарда.

«Эрик Адамс икки шаҳар ўртасидаги ҳамкорликни янада чуқурлаштиришга тайёрлигини билдирди ва ушбу ташриф Тошкентда амалга оширилаётган лойиҳалар билан батафсил танишиш имконини беришини таъкидлади» — дея қўшимча қилди ҳокимлик матбуот хизмати.

Томонлар шаҳарларни комплекс ривожлантириш, маданият, инновациялар ва иқтисодиёт соҳаларида узоқ муддатли ҳамкорлик учун асос бўладиган Тошкент ва Нью Йорк шаҳарлари ўртасида шериклик муносабатларини ўрнатиш тўғрисидаги битимни тайёрлашни бошлашга келишиб олдилар.

Эслатиб ўтамиз, 4 ноябрь куни Нью Йорк мэри лавозимига бўлиб ўтган сайловларда Демократик партиядан номзод Зохран Мамдани ғалаба қозонди. У янги йилдан бошлаб лавозимга киришади.