Комил Алламжонов Президент администрациясининг АҚШдаги вакили этиб тайинланди

Ўзбекистон Президент администрацияси раҳбарининг маслаҳатчиси Комил Алламжонов маслаҳатчи-вакил — ПАнинг АҚШдаги вакили лавозимига тайинланди. Бу ҳақда давлат раҳбари матбуот хизмати хабар берди.

ПА раҳбари фармойишига кўра, у администрация раҳбарининг маслаҳатчиси лавозимидаги фаолиятини ҳам давом эттиради.

Эслатиб ўтамиз, июнь ойида Комил Алламжонов Президент администрацияси янги раҳбари Саида Мирзиёеванинг мустақил маслаҳатчиси этиб тайинланганди.

Президент маъмуриятининг АҚШдаги вакил-маслаҳатчиси лавозими келаси йилнинг 1 январида «ташқи сиёсат ва ҳукумат ташаббусларини мувофиқлаштириш самарадорлигини ошириш» мақсадида президент фармони билан таъсис этилмоқда.

Вакил-маслаҳатчи Ўзбекистон ва АҚШда йирик ва стратегик инвестиция ва савдо лойиҳаларини амалга оширишни бевосита бошлаш ва муҳокама қилиш, шунингдек, АҚШ томонидан АҚШ-Ўзбекистон Бизнес ва инвестиция кенгаши ишини ҳар томонлама мувофиқлаштириш учун жавобгар бўлади.

Кенгашга АҚШ томонидан Саида Мирзиёева, АҚШ томонидан эса АҚШнинг Жанубий ва Марказий Осиё бўйича махсус элчиси Сержио Гор раислик қилади.

Сентябрь ойида Комил Алламжонов АҚШдаги Жорж Вашингтон университетининг Марказий Осиё тадқиқотлари дастурининг махсус маслаҳатчиси этиб тайинланганди.