Самарқанд вилоятидаги туман ҳокимлари чет эллик менежерларни жалб қилади
«Ўзида кўп минг йиллик тарих ва қадриятларни мужассам этган, замонавий меъморчилик анъаналари асосида кундан-кунга чирой очиб бораётган бу улуғ замин дунё цивилизациясида ўз ўрнини тобора мустаҳкамлаб бормоқда», — деди у.
Йирик ўзгаришлар қаторида давлат раҳбари «Боқий шаҳар» мажмуаси барпо этилгани, 40 дан ортиқ муқаддас зиёратгоҳлар ободонлаштирилгани, янги «Самарқанд» халқаро аэропорти қурилгани, ўнлаб халқаро меҳмонхона брендлари очилганини алоҳида таъкидлади.
Унинг сўзларига кўра, мазкур лойиҳалар вилоятнинг туризм салоҳиятини сифат жиҳатидан янги босқичга кўтарган.
Сўнгги йилларда Самарқанд йирик сиёсий, иқтисодий, сайёҳлик ва ишбилармонлик марказига айланиб, кўплаб глобал тадбирларга мезбонлик қилмоқда. Биргина жорий йилнинг ўзида у 40 дан ортиқ нуфузли халқаро форумларга, жумладан, ЮНЕСКО Бош конференциясининг 43-сессиясига мезбонлик қилди.
Туризм ва унга алоқадор тармоқларга йўналтирилган 1 миллиард долларлик сармоя 2016 йилга нисбатан минтақага сайёҳлар оқимини етти баробар оширди. Туризм экспорти 600 миллион долларга етди.
Имом Бухорий мақбарасининг 45 гектарга кенгайтирилгани, 10 минг ўринли масжид ва инновацион музей қурилгани, мажмуа атрофида ўнлаб меҳмонхона ва меҳмон уйлари барпо этилгани алоҳида таъкидланди.
Унинг сўзларига кўра, Индонезия ва Малайзиядан етакчи сайёҳлик компаниялари таклиф қилинса, меҳмонхоналар бошқарувга берилса, ўзаро манфаатли ҳамкорлик йўлга қўйилса, сайёҳлар оқими сезиларли даражада ошиши мумкин.
Президент минтақадаги ижтимоий-иқтисодий ўзгаришлар жадал суръатларда бораётганини алоҳида таъкидлади:
- охирги саккиз йилда 12 миллиард долларлик инвестициялар жалб қилинди;
- 600 минг доимий иш ўрни яратилди;
- тадбиркорлар сони икки баравар кўпайди;
- ишлаб чиқариш корхоналари сони 1,5 бараварга, саноат ҳажми 1,7 баробарга ўсди;
- минтақада 55 давлатдан сармоядорлар ўз фаолиятини бошлади, хорижий корхоналар сони эса 700 га яқинлашди.
2024 йил ва жорий йилнинг 10 ойи давомида вилоятда 15 миллион квадрат метр турар жой ва тижорат кўчмас мулклари ташкил этилди. Самарқанд қурилиш ташкилотлари ҳар йили мамлакат бўйлаб 4,5 миллион квадрат метр объект қурмоқда.
Ялпи ҳудудий маҳсулот (иқтисодий ҳажм) 2016 йилдаги 23 триллион сўмдан 2025 йил охирига келиб 120 триллион сўмгача ошади.
Мирзиёев амалга оширилаётган ишлар вилоятдаги оилалар турмуш фаровонлигини сезиларли даражада яхшилаганини таъкидлади. Ҳисобот даврида 2 триллион сўм маблағ эвазига 3200 километр сув ва канализация тармоқлари қурилди.
Президент вилоят ишсизлик ва камбағалликни камайтириш, сармоя ва экспорт ҳажмини ошириш, ишлаб чиқариш таннархини қисқартириш, энергия самарадорлигини ошириш бўйича методик платформага айланиши кераклигини таъкидлади.
«Бунинг учун туман ҳокимлари ўзини ҳудудини хусусиятидан келиб чиқиб, бор штатларини таҳлил қилиб, самарасизини қисқартириб, хориждан замонавий менежерлар, мутахассислар олиб келиб, янгича ишлашга ўтиши зарур», — деди у.
Эслатиб ўтамиз, аввалроқ Самарқанд вилояти депутатлари вилоят ҳокими лавозимига Адиз Бобоев номзодини қўллаб-қувватлаган эди. Ҳоким олдида ҳудудни иқтисодий ривожланиш ва камбағалликни қисқартириш моделига айлантириш вазифаси турибди.