Тошкент шаҳри суди раиси собиқ ўринбосари ва уч судьяга жиноят иши қўзғатилди

Бош прокуратура Тошкент шаҳри суди раисининг собиқ ўринбосари Муроджон Мирзажонов, шунингдек, шаҳар жиноят ишлари бўйича судининг собиқ судьялари Одилбек Илхомжонов, Мирзиёд Абидов ва Муҳтарам Тургуновга қарши жиноят иши қўзғатди. Бу ҳақда БП матбуот хизмати хабар берди.

Иш материалларига кўра, октябрь ойида Мирзо Улуғбек тумани жиноят ишлари бўйича суди Акмал Шукуровни йирик миқдордаги фирибгарлик, безорилик ва қасддан оғир тан жароҳати етказишда (Борис Авакянни калтаклагани ва бошқа айбловлар бўйича) айбдор деб топди. Биринчи инстанция суди уни 8 йил ва 1 ойлик қамоқ жазосига ҳукм қилди.

Шундан сўнг судланувчи апелляция шикояти берди. Илҳомжонов, Абидов ва Тургуновадан иборат апелляция суди ҳукмни бекор қилди, Жиноят кодексининг 57-моддасини қўллади ва жазони уч йилга озодликдан чеклаш билан алмаштирди.

Бош прокуратуранинг таъкидлашича, Тошкент шаҳри суди раиси ўринбосари Муроджон Мирзажонов ўз хизмат мавқеини суиистеъмол қилиб, ишга аралашган ва судьяларга ноқонуний таъсир кўрсатган.

«Оқибатда судьялар О.Илхомжонов, М.Абидов ва М.Тургуновалар унинг топшириғи ноқонуний эканлигини олдиндан била туриб, одил судловни амалга ошириш ва қарор қабул қилишда мустақил бўлсалар-да, жавобгарликнинг муқаррарлиги принципига амал қилмасдан, биринчи инстанция судининг ҳукмини ўзгартирди», — дейилади хабарда.

Шукуровнинг жазо муддати қисқартирилди ва у суд залида қамоқдан озод қилинди.

Ташкилот бундай ҳаракатлар оғир оқибатларни юзага чиқарувчи ноқонуний ва адолатсиз суд қарорига олиб келганини таъкидлади.

Муроджон Мирзажонов жиноят иши доирасида Илхомжонов, Абидов ва Тургуновага ҳам айблов эълон қилинди. Улар ҳибсга олинди. Терговга Бош прокуратура раҳбарлик қилмоқда.

Ташкилот маълумотларига кўра, Мирзажонов Жиноят кодексининг 231-моддаси 2-қисми (Одам ўлимига ёки бошқа оғир оқибатларга олиб келадиган адолатсиз ҳукм, ҳал қилув қарори, ажрим ёки қарор чиқариш) ва 236-моддаси 2-қисми (мансабдор шахс томонидан тергов қилишга ёки суд ишларини ҳал этишга аралашиш) бўйича айбланмоқда, собиқ судьялар — Жиноят кодексининг 231-моддаси 2-қисми бўйича.

Эслатиб ўтамиз, декабрь ойида Тошкент прокуратураси назорат шикояти билан мурожаат қилган эди. 18 декабрь куни Тошкент шаҳри судининг назорат ҳайъати апелляция қарорини бекор қилди ва Шукуровни қисман жами жазоларни ҳисобга олган ҳолда олти йилга озодликдан маҳрум қилди. Унинг фирибгарлик айблови ҳам енгиллаштирилди, чунки у етказилган зарарни тўлиқ қоплади ва шу билан жазо муддати қисқартирилди.

Қамоқда ўтказилган вақтни ҳисобга олган ҳолда, 5 йил, 3 ой ва 12 кунлик муддати қолди.