Ўзбекистон 2012 йилда қабул қилинган Ташқи сиёсат концепциясини янгилашни режалаштирмоқда
Унинг сўзларига кўра, дунёдаги геосиёсий ўзгаришлар, халқаро муносабатлар тизимидаги беқарорлик, минтақавий қарама-қаршиликлар ва глобал иқтисодий ўзгаришлар ҳар бир давлатдан ўз ташқи сиёсатини доимий равишда қайта кўриб чиқишни ва уни миллий манфаатлар ва замон талабларига мослаштиришни талаб қилади.
Унинг таъкидлашича, сўнгги йиллардаги очиқ, прагматик ва мувозанатли ташқи сиёсат натижасида Ўзбекистоннинг мавқеи ва халқаро нуфузи мустаҳкамланиб бормоқда.
Шу билан бирга, глобал хавфсизлик архитектурасидаги ўзгаришлар, янги иқтисодий иттифоқлар ва савдо йўлларининг шаклланиши ҳамда технология ва энергетика бозорларининг ўзгариши ташқи сиёсатда янада фаол, мақсадли ва натижага йўналтирилган ёндашувни талаб қилади, деди у.
Шу муносабат билан Шавкат Мирзиёев Ўзбекистон Ташқи сиёсат концепциясини янгилаш, унинг устувор йўналишларини қайта кўриб чиқиш, миллий манфаатларни ҳимоя қилиш ва мамлакатнинг халқаро майдондаги мавқеини мустаҳкамлашга қаратилган аниқ мақсадларни белгилаш зарурлигини таъкидлади.
«Янги концепция мамлакатимизнинг узоқ муддатли стратегик мақсадларини, ички ислоҳотларимиз мантиғини, иқтисодий дипломатия, хавфсизлик, инвестиция, экспорт, транспорт-логистика, сув ва иқлим масалаларидаги миллий манфаатларимизни яхлит ва ўзаро боғлиқ ҳолда акс эттириши лозим», — деб таъкидлади у.
Ташқи сиёсат концепцияси биринчи президент Ислом Каримов томонидан 2012 йил 10 сентябрда имзоланган қонун (ЎРҚ — 330) билан тасдиқланган. Ҳужжат ҳозирда Миллий қонунчилик базасида (Lex.uz) йўқ. Қонунга ҳавола Сенат кенгаши қарори матнида сақланиб қолган, аммо саҳифага ўтилганда «404» (Саҳифа топилмади) хатолиги пайдо бўлади.
2021 йилги Давлат дастури лойиҳасида концепцияни «такомиллаштириш» режалаштирилган эди, аммо ҳужжатга сўнгги ўзгартиришлар 2019 йилда киритилган ва «ҳарбий доктрина» «мудофаа доктринаси» билан алмаштирилган.
Gazeta 2012 йилда ёзганидек, Ташқи сиёсат фаолияти концепцияси қуйидаги асосий қоидаларни ўз ичига олади:
1) Ўзбекистон давлат, халқнинг олий манфаатлари, унинг фаровонлиги ва хавфсизлиги, мамлакатни модернизация қилишнинг устувор йўналишлари, амалдаги миллий қонунчилик ва қабул қилинган халқаро мажбуриятлардан келиб чиқиб, иттифоқларга кириш, ҳамдўстликларга ва бошқа давлатлараро тузилмаларга қўшилиш, шунингдек, улардан чиқиш ҳуқуқини ўзида сақлаб қолади;
2) Ўзбекистон тинчликпарвар сиёсат юритади ва ҳарбий-сиёсий блокларда иштирок этмайди ҳамда ҳарбий-сиёсий блокка айлантирилган тақдирда ҳар қандай давлатлараро тузилмадан чиқиш ҳуқуқини ўзида сақлаб қолади;
3) Ўзбекистон қўшни давлатлардаги қуролли можаролар ва кескинлик ўчоқларига аралашувининг олдини олиш учун сиёсий, иқтисодий ва бошқа чораларни кўрмоқда ҳамда ўз ҳудудида хорижий ҳарбий базалар ва иншоотларнинг жойлаштирилишига йўл қўймайди;
4) Конституция, Мудофаа тўғрисидаги қонун ва Ҳарбий доктринага мувофиқ, Ўзбекистон Қуролли Кучлари фақат мамлакатнинг давлат суверенитети ва ҳудудий яхлитлигини, аҳолисининг тинч ҳаёти ва хавфсизлигини ҳимоя қилиш учун тузилади ҳамда хориждаги тинчликпарварлик операцияларида қатнашмайди.
13 январь куни Хавфсизлик кенгашининг кенгайтирилган йиғилишида президент, шунингдек, 2018 йилги Мудофаа доктринаси ва 1997 йилги Миллий хавфсизлик концепциясини «замонавий хавф ва таҳдидларнинг тез ўзгариб бораётган мазмуни ва кўлами ҳамда мудофаа ва хавфсизлик соҳалари дуч келаётган асосий муаммолар»ни ҳисобга олган ҳолда янгилашни буюрганди.