Меҳнат мигрантлари билан ишлаш консулларнинг асосий вазифасига айланади — президент

15 январь куни бўлиб ўтган йиғилишда президент Шавкат Мирзиёев мамлакат фуқароларининг айримлари ноқонуний равишда чет элда эканидан хавотир билдирди.

Президентнинг сўзларига кўра, ўтган йили Россия 150 мингдан ортиқ фуқароларга «миграция амнистияси»ни муваффақиятли қўллаган.

Шавкат Мирзиёев бошқа давлатларда ҳам ўзбекистонликларга қонуний иш топишда ёрдам бериш ва бу масала бўйича хорижий давлатлар билан музокараларни фаоллаштириши кераклигини таъкидлади.

Президентнинг қайд этишича, фуқаролар ҳам ўзлари бўлиб турган мамлакат қонунчилиги талабларига риоя қилиши шарт.

Давлат раҳбарининг таъкидлашича, энди миграция оқими ўсишда давом этаётган мамлакатларда, хусусан, Европада меҳнат мигрантлари билан ишлаш консулларнинг асосий вазифаси бўлади.

Шунингдек, у хориждаги ўзбекистонликларни консулликлар ҳисобига қўйиш тартибини янада соддалаштириш ва ортиқча бюрократияни камайтиришни буюрди.