Тошкент шаҳри ҳокимининг коррупцияга қарши ички назорат бўйича ўринбосари тайинланди
Мирмухаммад Мирхамидов 1982 йилда Тошкентда туғилган. У Мирзо Улуғбек номидаги Ўзбекистон Миллий университети ва Тошкент давлат юридик институтини тамомлаган, адлия катта маслаҳатчиси.
Мирхамидов 2006 йилдан бери прокуратура органларида турли лавозимларда ишлаган. 2023 йилдан ҳозиргача у Бош прокуратуранинг суд ҳужжатлари ва бошқа органлар ҳужжатларини ижро этишда қонунийлик ижроси устидан назорат бошқармаси бошлиғи ўринбосари лавозимида ишлаб келаётганди.
Эслатиб ўтамиз, президент Шавкат Мирзиёев декабрь охирида парламент ва халққа мурожаатида коррупцияга қарши курашиш учун «фавқулодда ҳолат» эълон қилган ҳамда барча давлат идораларида комплаенс ва коррупцияга қарши ички назорат бўйича ўринбосар лавозимини жорий қилишни буюрганди.
Президент ушбу янги лавозимни эгаллаганлар бюджет маблағларини ўзлаштириш ва ваколатларини суиистеъмол қилишнинг олдини олишини, давлат раҳбарига бевосита ҳисобот беришини таъкидлаган. Унинг айтишича, мувофиқлик хизматлари фаолиятига тўсқинлик қилган шахслар коррупцияга шерик, дея баҳоланади.