Феруза Эшматова омбудсман этиб қайта сайланди

Олий Мажлис Қонунчилик палатаси депутатлари 24 февраль куни бўлиб ўтган ялпи мажлисда Феруза Фарходовна Эшматовани Инсон ҳуқуқлари бўйича вакил (омбудсман) лавозимига қайта сайлади, деб хабар берди парламент қуйи палатаси.

Феруза Эшматова (1979 йилда туғилган, мутахассислиги бўйича ҳуқуқшунос) ушбу лавозимга биринчи марта 2021 йилнинг январь ойида сайланганди. Бунга қадар у Сенатнинг Хотин-қизлар ва гендер тенглик масалалари қўмитаси раиси лавозимида ишлаган.

Феруза Эшматованинг омбудсман этиб сайланишини 128 нафар депутат бир овоздан қўллаб-қувватлади, 2 нафар депутат овоз бермади.

У ўз чиқишида қўллаб-қувватлаш ва ишонч учун миннатдорчилик билдириб, бу унинг учун «жуда катта шараф, лекин шу билан бирга, жуда катта масъулият» эканини қўшимча қилди.

Омбудсман мамлакатдаги барча ислоҳотлар негизида «инсон, унинг шаъни ва қадр-қиммати» ётганини таъкидлади. Мамлакатда қонунчилик босқичма-босқич такомиллашиб, инсон ҳуқуқларини ҳимоя қилишнинг мавжуд механизмлари янгиланаётгани ва янгилари яратилаётганини, бу соҳада омбудсман институти олдида «жуда катта ва муҳим вазифалар» турганини қўшимча қилди.

Омбудсман кетма-кет иккита беш йиллик муддатдан ортиқ сайланиши мумкин эмас. Номзод президент томонидан киритилади. Энди уни Сенат тасдиқлаши лозим.