Саида Мирзиёева Тошкентдаги транспорт тизимини модернизация қилиш жараёнини назорат қилади

Президент администрацияси раҳбари Саида Мирзиёева пайшанба куни Тошкент шаҳри ҳокимлигида кўчалардаги тирбандлик муаммоларини ҳал этиш, экология ҳамда жамоат транспорти тизимини ривожлантиришга оид тақдимот билан танишди. Бу ҳақда у ўзининг Telegram каналида маълум қилди.

Тақдимот президент Шавкат Мирзиёевнинг ўтган йил 4 декабрдаги қарори билан очилган Йўл ҳаракатини ташкил этиш маркази (ЙҲТЭМ) томонидан ўтказилди.

«Президентимизнинг транспорт тизимини модернизация қилишга оид қарорини ҳаётга татбиқ этиш ишлари бошланди… Берилган ҳисоботларга кўра, бугун-эрта „ақлли“ светофорларни ўрнатиш, йўлларга стандартларга мос чизиқлар тортиш ҳамда автотураргоҳларни тўғри ташкил қилиш бўйича кенг кўламли ишлар бошланади», — деб ёзди Саида Мирзиёева.

Тошкент шаҳри ҳокими Шавкат Умурзоқов ва «Ташкент Инвест» вакили Александр Гурко.

«Умид қиламанки, шаҳар ҳокими бошчилигидаги жамоа қарорнинг ижросини тўлақонли таъминлашга бор куч ва имкониятини қаратади. Мен бунинг бажарилишини шахсан назорат қилиб бораман. Пойтахт учун ўта муҳим, жуда зарур бўлган ушбу лойиҳани амалга оширишда жамоага муваффақият тилайман», — деди ПА раҳбари.

Gazeta аввалроқ Йўл ҳаракатини ташкил этиш маркази Тошкентда транспорт оқимини бошқариш, тезлик режимларини белгилаш, фиксация камералари ва зарядлаш станциялари ўрнатиш ва парковка инфратузилмасини ривожлантириш билан шуғулланиши ҳақида ёзганди.