Шавкат Мирзиёев Яқин Шарқ мамлакатларига қўллаб-қувватлаш ва бирдамлик сўзларини йўллади

Ўзбекистон ташқи ишлар вазири Бахтиёр Саидов 1 март куни Яқин Шарқ мамлакатларидаги ҳамкасблари билан телефон орқали мулоқот қилди. У ҳамкасблари билан минтақадаги вазиятни гаплашди ва уларнинг мамлакатларига президент Шавкат Мирзиёевнинг қўллаб-қувватлаш ҳамда бирдамлик сўзларини етказди.

Вазирнинг Telegram каналида хабар қилинишича, у қуйидагилар билан суҳбатлашган:

• Қатар бош вазири ва ташқи ишлар вазири Шайх Муҳаммад бин Абдураҳмон бин Жосим Ол Соний;
• Кувайт ташқи ишлар вазири Шайх Жарроҳ ас-Сабоҳ;
• Ўмон ташқи ишлар вазири Саййид Бадр бин Ҳамад ал Бусайдий;
• Иордания бош вазири ўринбосари, ташқи ишлар ва экспатриатлар ишлари вазири Айман Сафади;
• Баҳрайн ташқи ишлар вазири Абдуллатиф бин Рашид ал Заяни;
• БАА бош вазири ўринбосари, ташқи ишлар вазири Шайх Абдулла бин Заид Ол Наҳаён билан.

Суҳбатларда давлат суверенитети ва ҳудудий яхлитлигини ҳурмат қилиш муҳимлиги, шунингдек, минтақавий барқарорликни таъминлаш мақсадида барча масалаларни халқаро ҳуқуқ нормаларига тўлиқ мувофиқ ҳолда фақат тинч, сиёсий-дипломатик воситалар орқали ҳал этиш зарурлиги алоҳида таъкидланди.

Бахтиёр Саидов, шунингдек, Озарбайжон ташқи ишлар вазири Жайҳун Байрамов билан ҳам мулоқот ўтказди. Улар давлат суверенитети ва ҳудудий яхлитлигини ҳимоя қилиш, халқаро ҳуқуқ нормаларига қатъий риоя этиш масалаларида позициялар муштарак эканини қайд этди, шунингдек, барча кескинликларни мулоқот ва дипломатик воситалар орқали ҳал этишга содиқ эканликларини билдирди.

Аввалроқ Ўзбекистон Ташқи ишлар вазирлиги АҚШ ва Исроилнинг Эронга ҳужумлари ҳамда Эроннинг минтақа мамлакатларига берган жавоб зарбалари ортидан Яқин Шарқдаги вазиятнинг кескин ёмонлашгани муносабати билан «жиддий хавотир» билдирганди.

«Биз томонларни нафақат ҳарбий-сиёсий, балки гуманитар жиҳатдан олдиндан кўриб бўлмайдиган оқибатларга олиб келиши мумкин бўлган хавфли кескинлашувга сабаб бўладиган кейинги қадамлардан тийилишга чақирамиз», — дейилади ТИВ баёнотида.

Ўзбекистон изчил равишда «минтақавий барқарорлик ва хавфсизликни мустаҳкамлаш тарафдори бўлиб келади ва вазиятнинг тезроқ нормаллашишига умид қилади» деб қайд этилган баёнотда.