Тошкентда газ таъминоти ходими $21 минг олаётганда қўлга олинди

Тошкент шаҳрида коррупцияда гумон қилиниб, Сергели тумани газ таъминоти бўлими ходими қўлга олинди.

Ҳуқуқни муҳофаза қилувчи органлар маълумотига кўра, у танишлари орқали зарур ҳужжатларни расмийлаштириш, дўконни ноқонуний тарзда рўйхатдан ўтказиш ва уни газ тармоғига улаш учун рухсат олиб беришни ваъда қилган. Бу хизматлари учун эса 21 минг доллар талаб қилган.

Гумонланувчи пул маблағини олаётган вақтда ашёвий далиллар билан ушланган. Мазкур ҳолат юзасидан Ўзбекистон Жиноят кодексининг фирибгарлик ва пора бериш билан боғлиқ моддалари бўйича жиноят иши қўзғатилди.