Жаҳон соғлиқни сақлаш ташкилоти раҳбари: ҳозирча хантавируснинг кенг тарқалиш белгилари йўқ

Жаҳон соғлиқни сақлаш ташкилоти (ЖССТ) бош директори Тедрос Адханом Гебрейесус айни пайтда “Андес” хантавирусининг кенг кўламли тарқалиши бошланганини кўрсатувчи белгилар йўқлигини маълум қилди. Шу билан бирга, у яқин ҳафталарда вазият ўзгариши мумкинлигидан огоҳлантирди.

“Ҳозирча биз касалликнинг йирик миқёсда тарқалиши бошланганини кўрсатаётган ҳеч қандай белгиларни кузатаётганимиз йўқ”, — деди ЖССТ раҳбари.

Унинг сўзларига кўра, вируснинг инкубация даври узоқ бўлгани сабабли касалланганлар сони ортиши мумкин.

Хантавирус инфекцияси зооноз касалликлар қаторига киради ва асосан зарарланган кемирувчилар ёки уларнинг сўлаги, сийдиги ва ахлати билан алоқа қилиш орқали инсонга юқади.

Лотин Америкасининг айрим ҳудудларида тарқалган “Андес” штамми инсондан инсонга юқиши мумкин бўлган ягона маълум хантавирус тури ҳисобланади. Бироқ бундай юқиш эҳтимоли жуда паст бўлиб, одатда оила ичида ёки беморни парвариш қилиш каби яқин ва узоқ давом этувчи мулоқотни талаб қилади.

Касалликнинг тарқалиши Аргентинадан Кабо-Вердега йўл олган MV Hondius круиз лайнерида қайд этилган. Кемада 23 давлатдан 147 нафар йўловчи ва экипаж аъзолари бўлган.

Биринчи бемор 6 апрель куни ўзини ёмон ҳис қилган ва кейинчалик кема бортида вафот этган. Унинг турмуш ўртоғи ҳам касалланиб, Жанубий Африкага эвакуация қилингач вафот этган. Лаборатория таҳлиллари унда хантавирус инфекциясини тасдиқлаган.

Лайнерга чиқишдан олдин жуфтлик Аргентина, Чили ва Уругвай бўйлаб саёҳат қилиб, вируснинг табиий ташувчилари бўлган кемирувчилар яшайдиган ҳудудларда бўлган.

Кейинчалик яна бир йўловчи вафот этган. Бир нафар бемор ҳозирда Жанубий Африкадаги реанимация бўлимида даволанмоқда, унинг аҳволи яхшиланмоқда. Яна бир нечта бемор Нидерландияга даволаниш учун юборилган.

10 май куни лайнер Тенерифега етиб келган, шундан сўнг йўловчилар ва экипаж аъзоларининг аксарияти эвакуация қилиниб, кейинчалик ўз мамлакатларига қайтарилган.

11 май ҳолатига кўра, ЖССТ касалликнинг тўққизта эҳтимолий ҳолатини рўйхатга олган бўлиб, улардан еттитаси лаборатория текширувлари орқали тасдиқланган.