Ўзбекистон терма жамоаси оғир атлетика бўйича Осиё чемпионатида олтита медални қўлга киритди

Ҳиндистоннинг Гандинагар шаҳрида оғир атлетика бўйича Осиё чемпионати якунланди. Унда Ўзбекистон терма жамоаси муваффақиятли иштирок этиб, тўлиқ медаллар жамланмасини қўлга киритди.

Мусобақанинг сўнгги кунида +110 кг вазн тоифасида қатнашган ўзбекистонлик спортчи Амир Абдуллаев ажралиб турди. У «силтаб кўтариш» машқида 189 килограммни кўтариб, қитъа биринчилигининг кумуш медали совриндорига айланди.

Турнир якунларига кўра, олти нафар спортчи билан иштирок этган миллий терма жамоа ўз ҳисобини олтита медал билан бойитди: битта олтин, тўртта кумуш ва битта бронза.

Аввалроқ ўзбекистонлик оғир атлетикачилар Мисрда ўтказилган ўсмирлар ўртасидаги жаҳон чемпионатида ҳам муваффақиятли иштирок этиб, битта кумуш ва учта бронза медални қўлга киритган эди.