Фаустино Оро: “Жавоҳир Синдоров Гукешни мағлуб этади”
Оро ўз таҳлилида Гукешнинг сўнгги йиллардаги натижаларига урғу берди:
“Айни дамда менга Синдоров яхшироқ ўйнаётгандек туюлмоқда. Албатта, Гукеш жуда кучли шахматчи, лекин 2025—2026 йилларда жаҳон чемпионлигини қўлга киритганидан сўнг унинг ўйинида пасайиш кузатилди. У рейтингда кўп очко йўқотди ва ҳозир аввалги барқарорликни намойиш этмаяпти”.
Ёш гроссмейстер Гукешнинг муваффақиятсизликларига мисол тариқасида “Grand Swiss” турнирини эслади:
“Масалан, ўша турнирда у кетма-кет учта партияда мағлуб бўлган эди. Биз унинг потенциалини яхши биламиз, лекин Синдоровнинг Номзодлар турниридаги 10 очколик натижаси ва ҳозирги спорт формаси уни яққол устун қилиб кўрсатмоқда”.
Шу билан бирга, Оро шахматда олдиндан башорат қилиш қанчалик хавфли эканлигини Динг Лирен мисолида эслатиб ўтди. Унинг сўзларига кўра, Динг ҳам чемпионлик баҳси олдидан ёмон ўйнаётган эди, лекин ўйин давомида кескин кучайиб кетганди:
“Динг Лиренни эсланг... Биз ундан ҳеч нарса кутмаган эдик, чунки у ҳам ўша пайтда яхши спорт формасида эмасди. Лекин Гукешга қарши баҳснинг биринчи партиясини ютиб, деярли чемпионликни илиб кетишига оз қолганди. Шунинг учун шахматда олдиндан ҳеч нарса деб бўлмайди. Аммо ҳозирги ҳолатдан келиб чиқиб айтадиган бўлсам, мен Синдоровнинг ғалабасига ишонаман”.
Эслатиб ўтамиз, аввалроқ Халқаро шахмат федерацияси (FIDE) амалдаги жаҳон чемпиони, ҳиндистонлик Гукеш Доммаражу ҳамда даъвогар, ўзбекистонлик гроссмейстер Жавоҳир Синдоров ўртасидаги баҳс 2026 йилнинг 23 ноябридан 17 декабрига қадар бўлиб ўтишини маълум қилган.
Манба: daryo.uz