Ўзбекистон Афғонистонга қарийб 200 тонна гуманитар ёрдам юборди

Ўзбекистон Афғонистонга навбатдаги гуманитар ёрдам партиясини юборди. Қарийб 200 тоннадан иборат юк Президент Шавкат Мирзиёев топшириғига асосан Қурбон ҳайити арафасида, шунингдек, сел оқимлари ва сув тошқинларидан жабр кўрган аҳолини қўллаб-қувватлаш мақсадида етказилди.

Гуманитар ёрдам Балх вилоятига Ҳайратон шаҳри орқали етказилди. Ёрдамни топшириш маросимида Ўзбекистон Президентининг Афғонистон бўйича махсус вакили Исматилла Иргашев, Сурхондарё вилояти ҳокими Улуғбек Қосимов ҳамда Афғонистон томони вакиллари иштирок этди.

Юк таркибидан ун, гуруч, шакар, ўсимлик ёғи, макарон ва қандолат маҳсулотлари, нохат ҳамда тез тайёрланадиган озиқ-овқат маҳсулотлари ўрин олган.

Афғонистон вакиллари Ўзбекистон раҳбарияти ва халқига кўрсатилаётган қўллаб-қувватлаш ва гуманитар ёрдам учун миннатдорлик билдириб, ўзбек халқини яқинлашиб келаётган Қурбон ҳайити билан табриклади.