2023 йилдан буён қидирувда бўлган фуқаро АҚШдан Ўзбекистонга депортация қилинди

АҚШдан Ўзбекистонга 2023 йилдан буён халқаро қидирувда бўлган 37 ёшли фуқаро депортация қилинди. Бу ҳақда Ўзбекистон Ички ишлар вазирлиги матбуот хизмати хабар берди.

Вазирлик маълумотига кўра, мазкур шахс Нью-Йорк шаҳрида белгиланган тартибда аниқланиб, қўлга олинган.

У 2023 йилда гиёҳвандлик воситалари ва психотроп моддаларни ўтказиш мақсадисиз ноқонуний тайёрлаш, олиш ҳамда сақлашда гумон қилиниб қидирувга берилган эди.

Барча зарур расмий тартиб-таомиллар якунланганидан сўнг ушланган шахс кейинги тергов ҳаракатларини ўтказиш учун Ўзбекистонга депортация қилинди.