Бухоро вилоятида эркак ўғирланган сигирни Gentra салонида олиб кетишга уринди
Ҳодиса патрул хизмати вақтида содир бўлган. Инспекторлар қора Gentra ҳайдовчисига тўхташ ишорасини берган, аммо у талабга бўйсунмасдан қочишга ҳаракат қилган. Қисқа қувғиндан сўнг автомобиль тўхтатилган.
Текширув давомида ЙҲХБ ходимлари автомобилнинг орқа ўриндиғида сигир борлигини аниқлаган. Дастлаб ҳайдовчи ҳайвонни қариндошидан олганини айтган. Бироқ инспекторлар эгасининг исми ва манзилини сўраганида, у гапларида чалкашликка йўл қўйган.
Жойига тезкор-тергов гуруҳи чақирилган. Текширув жараёнида гумонланувчи фермер хўжалиги ҳудудидан сигирни ўғирлаганини тан олган.
Дастлабки маълумотларга кўра, ўғирланган сигирнинг қиймати тахминан 10 миллион сўмни ташкил этади.
Маълум бўлишича, ушбу шахс Навоий вилоятида истиқомат қилади ва аввал ҳам ўғрилик жинояти учун судланган. Унга нисбатан яна жиноят иши қўзғатилган.
Ҳодиса акс этган видео ижтимоий тармоқларда тарқалиб, фойдаланувчилар орасида кенг муҳокамаларга сабаб бўлган.