Андижонда ноёб ҳолат: бир йўла беш нафар чақалоқ дунёга келди

Андижон шаҳридаги 2-сон туғруқ мажмуасида аёл бир вақтнинг ўзида беш нафар фарзандни дунёга келтирди. Бу ҳақда Соғлиқни сақлаш вазирлиги матбуот хизмати хабар қилди.

«Қайрағочтош» маҳалласида яшовчи аёл 6 июль куни туғруқхонага ётқизилган. Муддатидан олдин туғруқ бошлангани сабабли шифокорлар кесар кесиш амалиётини ўтказишга қарор қилди.

Амалиёт тажрибали акушер-гинекологлар, неонатологлар ва реаниматологлардан иборат жамоа томонидан муваффақиятли амалга оширилди. Натижада уч нафар қиз ва икки нафар ўғил чақалоқ дунёга келди.

Янги туғилган чақалоқларнинг вазни қуйидагича бўлди:

• биринчи қиз — 1450 грамм;
• биринчи ўғил — 1605 грамм;
• иккинчи қиз — 1495 грамм;
• иккинчи ўғил — 1585 грамм;
• учинчи қиз — 1205 грамм.

Туғруқдан сўнг она ва беш нафар чақалоқ Андижон вилояти Республика ихтисослаштирилган она ва бола саломатлиги илмий-амалий тиббиёт маркази филиалига ўтказилди. У ерда уларга малакали тиббий ёрдам кўрсатилмоқда.

Соғлиқни сақлаш вазирлиги маълумотига кўра, она ва чақалоқларнинг аҳволи барқарор бўлиб, улар шифокорлар доимий назорати остида.