Шавкат Мирзиёев 8-9 июль кунлари расмий ташриф билан Беларусьга боради
Ташриф дастурига мувофиқ, Минск шаҳрида икки давлат раҳбарлари иштирокида олий даражадаги музокаралар ўтказилиши режалаштирилган. Учрашувларда Ўзбекистон ва Беларусь ўртасидаги кўп қиррали шериклик муносабатларини янада кенгайтиришнинг устувор йўналишлари муҳокама қилинади.
Музокараларда ўзаро товар айирбошлаш ҳажмини ошириш, қишлоқ хўжалиги, машинасозлик, фармацевтика, енгил саноат, озиқ-овқат саноати ҳамда иқтисодиётнинг бошқа тармоқларида саноат кооперациясини ривожлантириш масалаларига алоҳида эътибор қаратилиши кутилмоқда.
Шунингдек, томонлар маданий-гуманитар ҳамкорликни мустаҳкамлаш ва ўзаро алмашинув дастурларини кенгайтириш истиқболларини ҳам кўриб чиқади.
Ташриф якунлари бўйича икки мамлакат ўртасидаги ҳамкорликнинг устувор йўналишларини қамраб олган салмоқли ҳужжатлар тўпламини имзолаш режалаштирилган.
Президент ташрифи арафасида Минск шаҳрида Ўзбекистон ва Беларусь ҳудудлари делегациялари ҳамда ишбилармон доиралари вакиллари иштирокида III Ҳудудлараро форум ўтказилмоқда. Унда савдо-иқтисодий ва инвестициявий ҳамкорликни кенгайтиришга қаратилган қатор учрашувлар ва музокаралар ташкил этилган.