Ўзбекистоннинг «Samarkand — 2028» гиперспектрал сунъий йўлдошини 5 август куни орбитага чиқариш режалаштирилган. Учириш ишларини Хитойнинг Шаньдун вилояти соҳиллари яқинидаги денгиз старт платформасидан STAR.VISION компанияси амалга оширади.

Лойиҳа доирасида «Ўзбеккосмос» мутахассислари сунъий йўлдошнинг борт тизими учун махсус сунъий интеллект модулини ишлаб чиққан. Ушбу технология гиперспектрал маълумотларни тўғридан-тўғри орбитанинг ўзида қайта ишлаш имконини беради.

Мутахассислар таъкидлашича, сунъий йўлдошдан олинадиган маълумотлар қишлоқ хўжалиги, табиий ресурсларни мониторинг қилиш, атроф-муҳитни кузатиш ҳамда бошқа илмий ва амалий йўналишларда қўлланилиши режалаштирилган.

Айни пайтда ракета старт кемасига жойлаштирилган бўлиб, у учириш майдони томон ҳаракатланмоқда.