Фарғонада маст ҳайдовчи ЙПХ инспекторини уриб кетди, ходим шифохонада вафот этди
Маълум қилинишича, фожиа 2026 йил 31 июль куни соат тахминан 23:30 да Ўзбекистон тумани «Ўқчи» маҳалласи ҳудудидан ўтувчи 40V064 автомобиль йўлининг 20-километрида содир бўлган.
Дастлабки маълумотларга кўра, 1996 йилда туғилган А.Э. маст ҳолда «Spark» русумли автомашинани бошқариб кетаётган вақтда тунги хизматни олиб бораётган Фарғона вилояти ИИБ Жамоат хавфсизлиги хизмати ЙҲХБ 2-минтақавий ҳудуд ЙПХ отряди 3-сафарбар гуруҳи катта инспектори, сержант Хайитбек Каримжоновнинг тўхташ ҳақидаги қонуний талабига бўйсунмаган ва уни уриб юборган.
Йўл-транспорт ҳодисаси оқибатида сержант Хайитбек Каримжонов оғир тан жароҳатлари билан шифохонага етказилган. Бироқ шифокорлар томонидан кўрсатилган барча тиббий ёрдамга қарамасдан, у жонлантириш бўлимида вафот этган.
Мазкур ҳолат юзасидан Ўзбекистон тумани прокуратураси томонидан Жиноят кодексининг 266-моддаси 2-қисми ва 117-моддаси 2-қисми билан жиноят иши қўзғатилди. Ҳайдовчига нисбатан «қамоққа олиш» тарзидаги эҳтиёт чораси қўлланилган.
Ҳозирда иш бўйича дастлабки тергов ҳаракатлари давом этмоқда.