Янги тартибнинг энг муҳим жиҳати — жисмоний шахслар ўзаро пул ўтказишда қабул қилувчининг банк картаси ёки ҳисобварақ рақамини киритиши шарт бўлмайди. Пулни қабул қилувчининг мобил телефон рақамини кўрсатишнинг ўзи етарли бўлади. Бунда маблағ банк картасидан картага эмас, тўловчининг банк ҳисобварағидан қабул қилувчининг телефон рақамига боғланган банк ҳисобварағига Тезкор тўловлар тизими орқали ўтказилади.

Бунинг учун фойдаланувчи ўзининг мобил телефон рақамини банк ҳисобварағига боғлаши керак. Банк мобил иловасида рўйхатдан ўтган телефон рақами Банк депозиторларининг миллий ахборот базаси — БДМАБда реал вақт режимида рўйхатга олинади. Бир банк доирасида битта телефон рақамини фақат битта банк ҳисобварағига боғлаш мумкин.

Телефон рақами ҳисобвараққа боғланаётганда фойдаланувчига махсус “боғлаш коди” юборилади. Ушбу код банк мобил иловасига киритилганидан кейин телефон рақами тегишли ҳисобвараққа боғланган ҳисобланади.

Муҳим жиҳати, бир телефон рақамини турли банклардаги ҳисобварақларга боғлаш имконияти сақланади. Шу сабабли пул ўтказиш вақтида тизим қабул қилувчининг телефон рақамига боғланган банк ҳисобварақлари рўйхатини аниқлайди ва тўловчи маблағ қайси банкка ўтказилишини танлайди.

Жараён оддий ишлайди. Тўловчи банкнинг мобил иловасида қабул қилувчининг телефон рақами ёки “боғлаш коди”ни киритади. Тезкор тўловлар тизими ушбу маълумотлар асосида қабул қилувчининг тегишли банк ҳисобварақларини аниқлайди.

Кейин тўловчи банкни танлайди, маблағ миқдорини киритади ва тўловни тасдиқлайди. Ўтказма реал вақт режимида амалга оширилади. Тўловни тасдиқлашдан олдин банк мижозга ўтказма суммаси, қабул қилувчининг фамилияси, исми ва отасининг исми, шунингдек, воситачилик ҳақи мавжуд бўлса, унинг миқдори ҳақида маълумот кўрсатиши шарт. Бу пулни нотўғри шахсга юбориб қўйиш хавфини камайтиришга хизмат қилади.

Телефон рақами алмаштирилса ҳам алоҳида тартиб белгиланган. Фойдаланувчи банк мобил иловасида рақамини ўзгартирса, аввалги ҳисобвараққа боғланган телефон рақами автоматик равишда янги рақамга алмаштирилади. Шунингдек, мижоз мобил илова ёки банкка бевосита мурожаат қилиш орқали рақамни ҳисобварақдан ажратиши мумкин.

Банк айрим ҳолларда телефон рақамини мижознинг алоҳида топшириғисиз ҳам ҳисобварақдан ажратади. Хусусан, мобил иловадаги аккаунт ўчирилганда ёки фойдаланувчи вафот этган шахслар рўйхатида экани аниқланганда боғлаш бекор қилинади ва бу ҳақда мижозга хабар берилади.

Яна бир муҳим қоида — телефон рақами орқали қабул қилувчининг ҳисобварағига келиб тушган маблағлардан фойдаланиш банклар томонидан чекланмаслиги керак.

Шунингдек, банклар ўтказмаларни амалга оширишда жиноий даромадларни легаллаштириш, терроризмни молиялаштириш ва оммавий қирғин қуролини тарқатишни молиялаштиришга қарши талабларга риоя қилиши шарт.