Ўзбекистон ва Сингапур Стратегик ва инновацион шериклик дастурини муҳокама қилмоқда

Ўзбекистон ва Сингапур Стратегик ва инновацион шериклик бўйича ўрта муддатли қўшма дастурни ишлаб чиқишни муҳокама қилмоқда. Унда савдо, инвестициялар, технологиялар трансфери, давлат бошқаруви тизимини модернизация қилиш, инсон капиталини ривожлантириш, рақамлаштириш ва бошқа йўналишларга устуворлик берилади.

Ушбу масала 28 август, жума куни президент Шавкат Мирзиёевнинг Сингапур катта вазири, собиқ бош вазири (2004−2024 йиллар) Ли Сянь Лун бошчилигидаги делегация билан учрашувида муҳокама қилинди, деб хабар бермоқда Ўзбекистон президенти матбуот хизмати.

Томонлар товар айирбошлаш ҳажми ва қўшма корхоналар сони ўсиб борайтганини қайд этди. Маълум қилинишича, Сингапурнинг Ўзбекистон иқтисодиётига киритган инвестициялари ҳажми қарийб 2 миллиард долларни ташкил этган.

Ўзбекистонда махсус иқтисодий зоналар фаолиятини такомиллаштириш, Тошкент халқаро молия маркази ва рақамли банк тизимини ривожлантиришда Сингапурнинг илғор тажрибасини жорий этишга алоҳида эътибор қаратилди.

Томонлар яқинда Ўзбекистоннинг Медиация тўғрисидаги Сингапур конвенциясига қўшилганини олқишлади. Бу 2018 йилда қабул қилинган БМТнинг халқаро шартномаси бўлиб, турли мамлакатларда тижорат низолари бўйича тузилган келишувларни тезкор ижро этиш имконини беради.

Сингапур ҳукумати сайтида маълум қилинишича, Ли Сянь Лун 27−31 август кунлари Ўзбекистонда расмий ташриф билан бўлиб турибди. Бу унинг Марказий Осиёга илк ташрифи. Бундан аввал делегация Қозоғистонда бўлди.

Ли Сянь Луннинг Сенатда нутқ сўзлаши, шунингдек, Сингапур делегациясининг Самарқандга ташриф буюриши кутилмоқда.

Эслатиб ўтамиз, Шавкат Мирзиёев Ли Сянь Лун бош вазир бўлган даврда, 2023 йил январь ойида Сингапурга давлат ташрифи чоғида у билан музокаралар ўтказганди.

Ўшанда томонлар яқин истиқболда ҳамкорликнинг бешта асосий йўналишини белгилаган:

1. инсон капиталини ривожлантириш ва давлат бошқаруви учун юқори малакали кадрлар тайёрлаш;
2. Сингапурни Ўзбекистондаги хусусийлаштириш жараёнларига жалб қилиш;
3. илғор «яшил» технологиялар ва рақамли ечимларни жалб қилиш;
4. шаҳар инфратузилмаси ва коммуникацияларни такомиллаштириш;
5. инвестицияларни қўллаб-қувватлаш ва ўзаро савдони кенгайтириш.

Ўшанда устав капитали 500 млн доллар бўлган Ўзбекистон-Сингапур инвестиция компаниясини ташкил этиш бўйича ҳам келишувга эришилган.