Янги бош вазирнинг биринчи ўринбосари учта соҳада давлат органлари ва ҳокимлар ишини мувофиқлаштиради
Фармон билан ҳукумат тузилмасига Ўзбекистон бош вазирининг биринчи ўринбосари — таълим ва фан вазири лавозими киритилди. 9 октябрь куни ушбу лавозимга бунгача Сирдарё вилояти ҳокими бўлиб ишлаб келган Эркинжон Турдимов тайинланди.
Фармонга мувофиқ, бош вазирнинг биринчи ўринбосари — таълим ва фан вазири таълим, илм-фан ва соғлиқни сақлаш масалалари бўйича ўз ваколатлари доирасида вазирликлар, қўмиталар, агентликлар ва инспекциялар раҳбарларининг, шунингдек, Қорақалпоғистон Вазирлар Кенгаши раиси, вилоятлар ва Тошкент шаҳар ҳокимларининг фаолиятига умумий раҳбарлик қилади ҳамда уларни мувофиқлаштиради.
Турдимовга қайси идоралар бириктирилади?
Фармон иловасига кўра, бош вазирнинг биринчи ўринбосари — таълим ва фан вазирига бириктирилган органлар ва ташкилотлар рўйхатига қуйидагилар киритилди:
- Таълим ва фан вазирлиги ҳамда унинг тизимидаги Ихтисослаштирилган таълим муассасалари, Касб-ҳунар таълими, Инновацион ривожланиш ҳамда Билим ва малакаларни баҳолаш агентликлари;
- Соғлиқни сақлаш вазирлиги, Санитария-эпидемиологик осойишталик ва жамоат саломатлиги қўмитаси, Фармацевтика тармоғини ривожлантириш агентлиги ва Клиник аудит инспекцияси;
- Ички ишлар вазирлиги — таълим муассасаларида ҳамда ўқувчи ва талабалар ўртасида ҳуқуқбузарликлар ва зўравонлик жиноятларининг олдини олиш масалалари бўйича;
- Ёшлар ишлари агентлиги — ёшлар таълими, уларни касб-ҳунарга ўргатиш ва тарбиялаш масалалари бўйича;
- Фанлар академияси;
- бошқа вазирликлар, қўмиталар, агентликлар ва инспекциялар — уларнинг зиммасига таълим, илм-фан ва соғлиқни сақлаш соҳаларида юклатилган вазифалар қисмида;
- Қорақалпоғистон Вазирлар Кенгаши раиси ҳамда вилоятлар ва Тошкент шаҳар ҳокимларининг тегишли йўналишлар бўйича ўринбосарлари.
Ўзаро ҳамкорлик таъминланиши лозим бўлган ташкилотлар алоҳида белгиланди.
Улар қаторидан Давлат хавфсизлик хизмати — гиёҳвандлик воситаларининг ноқонуний айланмаси, ёшларни жиноий гуруҳларга жалб этиш, диний экстремизм ва терроризмнинг олдини олиш масалалари бўйича, шунингдек, Миллий гвардия — ўқувчи ва талабаларни ватанпарварлик руҳида тарбиялаш, мамлакат тақдирига дахлдорлик ҳиссини мустаҳкамлаш ва соғлом турмуш тарзини тарғиб қилиш масалалари бўйича ўрин олган.
Вазирлар Маҳкамасида янги котибият ташкил этилади
Фармонда штат бирлиги 12 кишидан иборат бўлган Таълим, илм-фан ва соғлиқни сақлаш масалалари котибиятини ташкил этиш кўзда тутилган.
Уларнинг бешта штат бирлиги Вазирлар Маҳкамасининг Ижтимоий ривожланиш масалалари бўлимидан ўтказилади, яна еттитаси эса қайта ташкил этилган Мактабгача ва мактаб таълими ҳамда Олий таълим, фан ва инновациялар вазирликлари штатларини мақбуллаштириш ҳисобига шакллантирилади.
Шу билан бирга, Вазирлар Маҳкамасининг ижро этувчи тузилмасидаги Ижтимоий ривожланиш масалалари бўлими Маданият ва спорт масалалари бўлими деб қайта номланади.
Вазирлар Маҳкамаси ижро этувчи тузилмаси бошқарув ходимларининг умумий сони 243 нафар этиб белгиланди.
Ҳукуматга икки ҳафта муддатда бош вазирнинг биринчи ўринбосари — таълим ва фан вазирининг функционал вазифаларини ҳамда унинг котибияти тўғрисидаги низомни тасдиқловчи қарор қабул қилиш топширилди.
Президент Шавкат Мирзиёев 12 октябрь куни Янги Тошкентда бўлиб ўтган учрашувда Эркинжон Турдимовнинг бош вазирнинг биринчи ўринбосари — таълим ва фан вазири этиб тайинланишига изоҳ берди.
«Ўзингиз кўрдингиз: мен таълим вазирини алмаштирдим. Энг кўп ишонадиган одамимни олиб келиб, таълим вазири қилиб қўйдим, чунки [ОТМларнинг] сони кўпайди, лекин сифати тушиб кетди. Бу мени жуда ташвишга соляпти», — деди президент.
Унинг сўзларига кўра, бунгача тўртта вилоятни бошқарган Турдимовнинг бу лавозимга тайинланиши алоҳида аҳамиятга эга.
«Таълимга жуда катта эътибор бериш учун мен бош вазир биринчи ўринбосари мақомини берганим бежиз эмас. Энди давлатда тиббиётга, таълимга эътибор мутлақо ўзгаради», — деб таъкидлади Шавкат Мирзиёев.