Ҳаёт Иноғомов Тошкентнинг Чилонзор тумани ҳокими этиб тасдиқланди

Ҳаёт Илясович Иноғомов Тошкент шаҳрининг Чилонзор тумани ҳокими лавозимига тасдиқланди. Бу ҳақда пойтахт ҳокимлиги матбуот хизмати хабар берди.

Бунга қадар у Янгиҳаёт тумани ҳокими лавозимида ишлаган ва 2020 йил ноябридан — туман ташкил этилганидан буён унга раҳбарлик қилиб келган.

Ҳаёт Иноғомов 1986 йилда Тошкент шаҳрида туғилган. 2006 йилда Тошкент автомобиль йўллари институтини, 2008 йилда эса шу олийгоҳ магистратурасини тамомлаган.

Турли йилларда транспорт ва йўл инфратузилмаси соҳасида, шунингдек, давлат бошқаруви тизимида масъул лавозимларда ишлаган.

2020 йил 16 ноябрда Иноғомов Тошкент шаҳрининг Сергели ва Бектемир туманлари, шунингдек, Тошкент вилоятининг бир нечта туманлари ҳудудлари ҳисобидан ташкил этилган Янгиҳаёт туманининг биринчи ҳокими этиб тасдиқланган эди.

Чилонзор тумани ҳокими лавозимида у бошқа ишга ўтиши муносабати билан лавозимидан озод этилган Саидқаҳҳор Холхўжаевнинг ўрнини эгаллади.

Холхўжаев Чилонзор туманига 2022 йил августидан буён — тўрт йилдан ортиқ вақт давомида раҳбарлик қилиб келган. У Инвестициялар, саноат ва савдо вазири ўринбосари лавозимини эгаллаши кутилмоқда.

Эслатиб ўтамиз, 15 октябрь куни Янгиҳаёт тумани ҳокими лавозимига Иноғомовнинг ўрнига Лазизбек Темиров тайинланди. Шу куни Яшнобод тумани ҳокими этиб Абдулазиз Абдулхаков тасдиқланди. Яккасарой тумани ҳокими Нилуфар Аллаберганова ўрнига эса Сергели тумани ҳокимининг биринчи ўринбосари Акмал Жумабоев тайинланиши мумкин.