Нилуфар Аллабергенова Яккасарой тумани ҳокими лавозимидан озод этилди

Нилуфар Аллабергенова бошқа ишга ўтиши муносабати билан Тошкент шаҳри Яккасарой тумани ҳокими лавозимидан озод этилди. Бу ҳақда Gazeta`га пойтахт ҳокимлиги ахборот хизмати тасдиқлади.

Унинг лавозимдан озод этилиш сабабларига ҳозирча аниқлик киритилмаган.

Gazeta манбасининг хабар беришича, 15 октябрь куни кечқурун Сергели тумани ҳокимининг молия, иқтисодиёт ва камбағалликни қисқартириш масалалари бўйича биринчи ўринбосари лавозимида ишлаб келаётган Акмал Мурадович Жумабоев номзоди Яккасарой тумани ҳокими лавозимига кўриб чиқилади. Унинг номзоди халқ депутатлари туман кенгаши томонидан тасдиқланиши керак.

Акмал Жумабоев. Фото: Facebook

Нилуфар Анваровна Аллабергенова 2023 йилнинг 9 октябрида Яккасарой туманига ҳоким этиб тайинланган эди. У Тошкент туманларидан бирига ҳоким этиб тайинланган илк аёл бўлган.

Аллабергенова 1971 йилда Тошкент шаҳрида туғилган. 1995 йилда Тошкент давлат юридик институтини тамомлаган.

Турли йилларда пойтахтнинг Яшнабод, Чилонзор ва Мирзо Улуғбек туманлари прокурори ўринбосари, Яккасарой тумани прокурори лавозимларида ишлаган.

Акмал Жумабоев 1987 йил 14 ноябрда Тошкент вилоятининг Паркент туманида туғилган. Тошкент автомобиль йўллари институтини тамомлаган.

Муқаддам Ёшлар иттифоқи Тошкент шаҳар кенгашини бошқарган, ташкилот Марказий кенгаши раисининг биринчи ўринбосари, сўнг раиси лавозимларида ишлаган.

2021 йил апрель ойида Сергели тумани ҳокимининг молия, иқтисодиёт ва камбағалликни қисқартириш масалалари бўйича биринчи ўринбосари этиб тайинланган ва ушбу лавозимда беш йилдан ортиқ фаолият юритган.

Шунингдек, Тошкент шаҳри Мирзо Улуғбек тумани халқ депутатлари кенгаши депутати бўлган.