Интерпол сайтида қидирувга берилган Anorbank акциядори Қаҳрамонжон Олимов ҳақидаги хабарнома йўқолди
Халқаро қидирув ҳақидаги хабарнома сентябрь охирида эълон қилинган эди. Карточкада Олимов 1977 йил 7 майда Андижон вилоятида туғилгани, Ўзбекистон фуқароси экани ҳамда ўзбек, рус ва инглиз тилларини билиши кўрсатилган эди.
Шу билан бирга, карточкада тадбиркорни халқаро қидирувга бериш бўйича сўровни қайси давлат юборгани маълум қилинмаганди.
Дастлаб оммавий хабарномада айблов ҳақидаги маълумотлар мавжуд эмасди. Кейинчалик унда жиноят категорияси: «Одам ўғрилаш, туҳмат қилиш, ноқонуний ушлаб туриш ёки ҳибсга олиш» пайдо бўлди.
Хабарноманинг Интерпол сайтидан йўқолиб қолиши сабаблари номаълум.
Интерпол сайтида қайд этилишича, «қизил билдиришнома»ларнинг аксарияти фақат ҳуқуқни муҳофаза қилувчи органлар учун очиқ бўлади, оммавий базада эса улар тегишли давлатнинг сўровига кўра эълон қилинади. Шу сабабли, карточканинг сайтдан йўқолишининг ўзи билангина тадбиркорга нисбатан халқаро қидирув тўхтатилгани ёки тўхтатилмаганини аниқлаб бўлмайди.
«Интерполнинг қизил билдиришномаси» (Red Notice) — бу шахсни қидириш ва ушлаб туриш бўйича халқаро сўров. Мамлакат бошқа давлатлардан шахсни кейинчалик экстрадиция қилиш масаласини ҳал этиш учун уни топиш ва вақтинча ушлаб туришни сўрайди.
Anorbank кузатув кенгашидан чиқиш
9 октябрь куни Anorbank Қаҳрамонжон Олимов 2 октябрда банк кузатув кенгаши таркибидан чиқиш бўйича ариза берганини маълум қилди. Ушбу масалани 28 октябрь куни ўтказиладиган акциядорларнинг умумий йиғилишида кўриб чиқиш режалаштирилмоқда.
Бундан ташқари, 5 октябрдаги йиғилишда акциядорлар инвестицияларни жалб қилиш, капитални мустаҳкамлаш ва илгари банкнинг кредит рейтингига таъсир кўрсатган омилларни бартараф этиш учун 100 миллиард сўмлик қўшимча акциялар чиқаришни маъқуллади.
«Капитализация режасининг бажарилиши энди алоҳида акциядор билан боғлиқ ҳолатларга қарам бўлиб қолмаслиги керак», — дейилади Anorbank хабарида.
8 октябрь куни Fitch Ratings халқаро рейтинг агентлиги Қаҳрамонжон Олимов билан боғлиқ вазият фонида капитални тўлдириш атрофидаги ноаниқликлар сабабли Anorbank’нинг узоқ муддатли рейтингини CCC+ даражасидан CCC гача туширди. Рейтинг, шунингдек, кейинчалик яна туширилиши мумкин бўлган салбий қайта кўриб чиқиш рўйхатига (Rating Watch Negative) жойлаштирилди.
Банк одатдаги режимда ишлашда, мижозлар олдидаги мажбуриятларни бажаришда ва асосий хизматларнинг узлуксиз ишлашини таъминлашда давом этаётганини билдирди.
2026 йилнинг тўққиз ойи учун Anorbank молиявий ҳисоботига кўра, банк деярли 105 млрд сўм соф фойда олди. Сентябрь якунларига кўра, унинг активлари учинчи чорак бошидаги 18,74 трлн сўмга нисбатан 20,32 трлн сўмни ташкил этди. Банкнинг кредит портфели 13,08 трлн сўмга, хусусий капитали 1,51 трлн сўмга, мижозлар депозитлари ҳажми эса 15,23 трлн сўмга етди.
Корхона ва ташкилотларнинг ягона давлат реестрининг аввал эълон қилинган маълумотларига кўра, Anorbank акцияларининг 49,4 фоизи Олимовга, 50 фоизи Нидерландиянинг Bekamin B.V. компаниясига, 0,6 фоизи эса Kapital Sug’urta суғурта компаниясига тегишли бўлган.
Олимов иши ҳақида нималар маълум?
18 сентябрь куни The Insider нашри Қаҳрамонжон Олимовга яқин манбасига таяниб, тадбиркор Ўзбекистонда сиртдан қамоққа олингани ва одам ўғрилаш бўйича жиноят иши доирасида халқаро қидирувга берилгани ҳақида хабар берди.
Нашр манбасининг талқинига кўра, бу иш Олимовнинг собиқ иш берувчиси — илгари тадбиркор бошқарув раиси бўлиб ишлаган ва 36% дан ортиқ улушга эгалик қилган «Капиталбанк» асосчиси Ботир Раҳимов билан бўлган эски молиявий низоси билан боғлиқ бўлиши мумкин.
The Insider Олимов Раҳимовни молиявий эътирозлардан воз кечишга мажбур қилиш мақсадида унинг ўғриланишини ташкиллаштиришда гумонланаётганини таъкидлаган эди.
Ўзбекистон ҳуқуқни муҳофаза қилувчи органлари ушбу маълумотларни расман тасдиқламаган ва тахмин қилинаётган жиноят иши тафсилотларини очиқламаган.
Халқаро қидирув ҳақидаги хабарлардан сўнг Anorbank тарқатилаётган маълумотлар акциядорлардан бирининг шахсий ишларига тааллуқли эканини ҳамда банкнинг капитали, бошқаруви ёки операцион фаолияти билан боғлиқ эмаслигини билдирди.
Марказий банк ҳам Anorbank одатдаги режимда ишлашда ва мижозлар олдидаги мажбуриятларини бажаришда давом этаётганини маълум қилди.