Саида Мирзиёева Туркия раҳбари билан учрашди, университет, мактаб ва мудофаа компаниясига борди

Ўзбекистон президенти администрацияси раҳбари Саида Мирзиёева 15 октябрь куни Анқарада Туркия президенти Режеб Таййип Эрдоған билан учрашди.

«Унга Ўзбекистон президенти Шавкат Мирзиёевнинг энг самимий тилакларини етказдим. Ўзбекистон ва Туркияни мустаҳкам дўстлик ҳамда яқин ҳамкорлик боғлаб туради. Биргаликдаги ишларимиз натижалари ва мамлакатларимиз ўртасидаги муносабатларни янада мустаҳкамлаш имкониятларини муҳокама қилдик», — деб ёзди у ўзининг Telegram каналида.

У Туркия раҳбарига «Ўзбекистонга эътибори ва халқларимиз ўртасидаги биродарлик муносабатларини қўллаб-қувватлаётгани учун» миннатдорлик билдирди.

Бундан аввал Саида Мирзиёева Истанбулга бориб, Туркия президентининг ўғли, тадбиркор Нежмиддин Билол Эрдоған билан бирга Ибн Халдун университети ва Yenidoğu мактабига ташриф буюрди.

«Ушбу муассасаларнинг ўқитиш услублари, ёндашувлари менда катта қизиқиш уйғотди. Бу ерда таълим сифатига, ёшларнинг иқтидорини рўёбга чиқариш ва уларда мустақил фикрлаш кўникмасини шакллантиришга алоҳида эътибор қаратилган», — деб маълум қилди у.

Томонлар «таълим масканларимиз ўртасидаги алоқаларни кенгайтириш, тажриба алмашиш ҳамда мактаб ўқувчилари, талабалар, педагоглар учун янги имкониятлар яратиш»га келишиб олди.

«Таълим соҳаси Ўзбекистон ва Туркия ўртасидаги дўстона муносабатларнинг муҳим қирраларидан биридир. Мазкур йўналишдаги ҳамкорлигимиз ёшларнинг ўқиб-ўрганиши, дунёқараши ўсиши ҳамда бир-бирини янада яқиндан танишига хизмат қилади», — деди Президент администрацияси раҳбари.

Бундан ташқари, у машҳур Bayraktar учувчисиз учиш аппаратларини ҳам ишлаб чиқарадиган Baykar авиация ва мудофаа компанияси мажмуасига ташриф буюрди.

Унга юқори технологиялар, жумладан, мудофаа саноати соҳасидаги ишланмалар тақдим этилди.

«Бундай ютуқлар замирида кўп йиллик илмий изланишлар, иқтидорли муҳандисларнинг меҳнати ҳамда миллий технологияларни ривожлантиришга киритилган инвестициялар турибди. Туркиянинг бу борадаги тажрибаси Ўзбекистон учун ҳам муҳим амалий аҳамиятга эга», — деб маълум қилди Саида Мирзиёева.

«Мутахассисларимиз ўртасида тажриба алмашиш ва технологик лойиҳалар устида биргаликда ишлаш имкониятларини кўряпман», — дея қўшимча қилди у.