Президент администрациясининг Коммуникациялар департаментида қатор тайинловлар амалга оширилди

Ўзбекистон Президенти администрациясининг (ПА) Коммуникациялар департаментида қатор тайинловлар амалга оширилди. Бу ҳақда администрация раҳбари Саида Мирзиёеванинг фармойишларига таяниб, давлат раҳбарининг матбуот котиби Шерзод Асадов маълум қилди.

ПА раҳбарининг фармойиши билан шу кунгача Коммуникациялар департаменти раҳбарининг биринчи ўринбосари лавозимида ишлаб келган Акрамжон Муроджон ўғли Фозилов президентнинг вакиллик органлари, нодавлат нотижорат ташкилотлари ва ёшлар масалалари бўйича маслаҳатчисининг биринчи ўринбосари этиб тайинланди.

Азиза Абдусобитовна Қурбонова департамент раҳбарининг биринчи ўринбосари бўлди. Бунгача у давлат раҳбари матбуот хизматининг Медиа марказида, ОАВ учун контент тайёрлаш марказида ишлаган, кўп йилларини телевидениега бағишлаган. «Микрофон кўтарган аёл» блоги муаллифи.

Хушнуд Ғайратович Худойбердиев департамент раҳбарининг ўринбосари лавозимига тайинланди. У 2020 йил июль ойидан буён Ўзбекистон Миллий ахборот агентлиги (ЎзА) бош директори ўринбосари, унгача эса Миллий масс-медиани қўллаб-қувватлаш ва ривожлантириш жамоат фонди директори лавозимида ишлаган. Маълумоти бўйича ҳуқуқшунос. Таниқли блогер ва жамоат арбоби.

Фаррух Фарҳоджонович Омонов бошқа ишга ўтиши муносабати билан Коммуникациялар департаменти раҳбари ўринбосари — президентнинг Халқ қабулхонаси раҳбари лавозимидан озод этилди. Унинг янги иш жойи ҳақида маълум қилинмаган.