Туркий давлатлар ташкилотининг Рақамлаштириш маркази ташкил этилиши мумкин

ТДТ саммитида Қозоғистон президенти Қасим-Жомарт Тоқаев ташкилотнинг Рақамлаштириш марказини ташкил этиш таклифини илгари сурди. Тузилма савдо, транспорт, сув ресурсларидан фойдаланиш, ахборот хавфсизлиги ва бошқа тармоқлар учун зарур рақамли ечимларни ишлаб чиқиш имконини беради.

Самарқандда ўтказилаётган Туркий давлатлар ташкилоти саммитида Қозоғистон президенти Қасим-Жомарт Тоқаев ташкилотнинг бугунги кундаги роли, туркий цивилизация тарихига оид қимматли далилларни ўрганишда ҳамкорлик қилиш ҳамда ташкилотнинг Рақамлаштириш марказини ташкил этиш борасида гапирди, дея хабар қилмоқда «Газета.uz» мухбири.

Президент сўзи аввалида туркий мамлакатларни бирлаштирган аксарият ташкилотлар — ТУРКСОЙ, ТуркПА ва Туркий академиянинг пайдо бўлиши Қозоғистон ташаббуси билан тузилганинии таъкидлаб ўтди. У ташкилот фаолиятини оммавий ахборот воситалари орқали фаол тарғиб қилиш ҳақида гапирар экан, унинг фаолияти билан ҳамма ҳам яхши таниш эмаслиги ҳақида гапирди. Бу ишни етакчи халқаро агентликлар ва мамлакатларнинг оммавий ахборот воситалари иштирокида амалга ошириш мумкинлигини қайд этди.

«Айни пайтда туркий ҳамкорлик ғояси жаҳон ҳамжамиятининг эътиборини тортмоқда. Дунёнинг турли бурчакларида туркий цивилизация тарихига оид қимматли далиллар тобора ортиб бормоқда. Бу халқларимизнинг умумий меросидир. Шу боис мавжуд тарихий ва лингвистик манбаларни ўрганиш ва тизимлаштиришни муҳим вазифа, деб биламан. Илмий муассасалар ўртасида фаол ҳамкорликни йўлга қўйишимиз, уларнинг тадқиқот натижаларини жаҳон ҳамжамиятига янада кенгроқ тақдим этишимиз зарур», — деди Қасим-Жомарт Тоқаев.

«Газета.uz»да реклама

Шунингдек, Қозоғистон раҳбари Astana Hub халқаро технопарки негизида Туркий давлатлар ташкилотининг Рақамлаштириш марказини ташкил этишни таклиф қилди.

«Ушбу тузилма савдо, транспорт, сув ресурсларидан фойдаланиш, ахборот хавфсизлиги ва бошқа муҳим тармоқлар учун жуда зарур бўлган рақамли ечимларни ишлаб чиқиш имконини беради. Ташаббусни самарали амалга ошириш учун муҳим стартап лойиҳаларга сармоя жалб этадиган Туркий мамлакатлар венчур фондини ташкил этишни таклиф қиламан», — деди мамлакат раҳбари.

Қасим-Жомарт Тоқаев Туркий тиллар университетлари иттифоқи шафелигида ўтказиладиган II Туркий универсиада 2023 йилда Қозоғистонда ўтказилиши режалаштирилаётганини маълум қилди.

«Ташкилотимиз фаолияти фақат дипломатик саммитлар ва якуний ҳужжатлар имзоланадиган учрашувлар билан чекланиб қолмаслиги керак. ТДТ туркий дунёни бирлаштирувчи ва яқинлаштирувчи нуфузли платформага айланиши керак, деб ҳисоблайман. Биз барча чорлов ва таҳдидларга биргаликда қарши туриш учун бирдамлик кўрсатишимиз, қудратли ва нуфузли кучга айланишимиз керак», — деди Қозоғистон президенти.