“Оғир” туман ва “оғир” маҳаллаларга бюджетдан 3,6 трлн сўм маблағ йўналтирилди
Хусусан, қисқа вақт ичида 167 минг нафар аҳоли доимий иш ўринлари билан таъминланди. 737 минг нафар фуқаро даромадларини оширишга қаратилган аниқ хизматлар билан қамраб олинди, 241 минг нафар норасмий банд аҳолининг меҳнат фаолияти легаллаштирилди. Бу, энг аввало, аҳоли бандлигини таъминлаш ва яширин иқтисодиётни қисқартириш борасида амалга оширилаётган ислоҳотларнинг амалий натижасидир.
Аҳолини манзилли қўллаб-қувватлаш бўйича дастурлар доирасида ҳам тизимли ишлар олиб борилмоқда. “Меҳнатсевар аёл” дастури орқали 26 минг нафар хотин-қизлар, “Барқарор келажак сари” дастури доирасида 58 минг нафар ёшлар даромадли меҳнат билан таъминланди. Бу эса ижтимоий ҳимоя ва иқтисодий фаолликни уйғунлаштиришга қаратилган ёндашувнинг самарасини кўрсатмоқда.
Шунингдек, 86 мингта камбағал оила билан манзилли иш олиб борилиб, “индивидуал режалар” асосида 105 мингта хизматлар кўрсатилди. Бу орқали ушбу оилаларнинг барқарор даромад манбалари шакллантирилмоқда.
Кичик ва ўрта бизнесни қўллаб-қувватлаш иқтисодий ўсиш ва бандликни таъминлашнинг асосий омилларидан бири сифатида қаралмоқда. Шу мақсадда жами 35 трлн сўм маблағ йўналтирилиб, шундан 8 трлн сўм кредитлар тадбиркорлик дастурлари доирасида ажратилди.
Жумладан, Оилавий тадбиркорлик дастури доирасида 1,2 трлн сўм, “Кичик бизнесни узлуксиз қўллаб-қувватлаш” дастури бўйича 1,3 трлн сўм, “Бизнесга биринчи қадам” дастури доирасида 1,1 трлн сўм ҳамда “Маҳалла лойиҳаси” доирасида 4,2 трлн сўм маблағлар йўналтирилди.
Маҳалла даражасида иқтисодий фаолликни кучайтириш мақсадида 21 мингта микролойиҳа ишга туширилиб, 52 минг нафар аҳолининг даромадлари оширилди. Бу маҳалла иқтисодиётини ривожлантириш орқали аҳоли бандлигини таъминлашнинг самарали механизмига айланмоқда.
Ижтимоий жиҳатдан оғир ҳудудларни қўллаб-қувватлашга алоҳида эътибор қаратилмоқда. Хусусан, танлаб олинган 37 та “оғир” туман ва 903 та “оғир” маҳаллага республика бюджетидан 3,6 трлн сўм маблағлар ажратилди.
Шу билан бирга, “Янги Ўзбекистон қиёфаси” мақоми берилган 33 та туман (шаҳар) ва 330 та маҳаллага 4 трлн сўм маблағлар йўналтирилди. Бу ҳудудларда инфратузилмани яхшилаш ва иқтисодий фаолликни оширишга хизмат қилади.
Қайд этилган натижалар камбағалликни қисқартириш ва аҳоли бандлигини таъминлаш давлат сиёсатининг устувор йўналишларидан бири эканини ҳамда бу борадаги ишлар аниқ натижалар бераётганини яққол кўрсатади.