Ҳалоков профессионал боксдаги 3-жангини ҳиндистонлик жангчига қарши ўтказади

Тошкент шаҳридаги “Ҳумо Арена”да Олимпиада чемпионлари ва жаҳон юлдузлари иштирокида профессионал бокс оқшоми ўтказилади. 29-май куни бўлиб ўтадиган мусобақада Париж Олимпиадаси ғолиби, Жаҳон ва Осиё чемпиони Абдумалик Ҳалоков ҳиндистонлик Аниш Кумарга қарши рингга кўтарилади.

Аввалроқ, Ҳалоков танзаниялик Рамадан Иддига қарши баҳс олиб бориши мумкинлиги хабар қилинган эди.

Бу ўзбекистонлик чарм қўлқоп устаси учун проф рингдаги учинчи жанг бўлади. У аввалги икки рақибини ҳам мағлубиятга учратган. Ҳинд боксчиси эса 5 та ғалаба, 6 та мағлубият ва 1 та дуранг натижа қайд этган. Ғалабаларининг барида рақибларини муддатидан аввал мағлубиятга учратган. Ўзи эса икки бор нокаутга учраган.

Маълумот учун, турнирнинг марказий жанги супер енгил вазн тоифасида INF ва WBA йўналишлари бўйича собиқ Жаҳон чемпиони Муроджон Аҳмадалиев иштирокида кечади. У венесуэлалик Ҳегли Москедага (27-1) қарши рингга кўтарилади.

Яна бир муҳим жанг икки карра Олимпия чемпиони, кубалик Робейси Рамирес (17-3) ҳамда тожикистонлик маҳоратли боксчи Асрор Воҳидов (13-1) ўртасида бўлиб ўтиши кутилмоқда.

Оғир вазн тоифасида Олимпия ўйинлари чемпиони Лазизбек Муллажонов (7-0) WBC Eurasia чемпионлик камари учун рингга кўтарилади. Яна бир Олимпиада чемпиони Абдумалик Ҳалоков (2-0) иштирокидаги беллашув ҳам кечанинг энг кутилган жангларидан бири сифатида эътироф этилмоқда. Шу билан бирга, ярим оғир вазнда мағлубиятсиз серия қайд этаётган россиялик Али Исмаилов (13-0) ҳам WBC Eurasia камари учун баҳс олиб боради.

Манба: www.daryo.uz