Манамада оғир атлетика бўйича жаҳон чемпионати бошланди

Бугун Баҳрайн пойтахти Манама шаҳрида оғир атлетика бўйича жаҳон чемпионати старт олади. Мусобақадан аввал Халқаро оғир атлетика федерациясининг навбатдаги Конгресси бўлиб ўтди. Мазкур тадбирда Ўзбекистон номидан Спорт вазирининг ўринбосари, мамлакат оғир атлетика федерацияси раисининг биринчи ўринбосари Шаҳрулло Маҳмудов иштирок этди.

Конгресс давомида ташкилотнинг янги Олимпия цикли учун ўз олдига қўйган режалари кўриб чиқилди. Кўпчиликнинг диққат-эътиборини тортгани Лос-Анжелес — 2028 ёзги Олимпия ўйинлари учун эълон қилинган вазн тоифалари бўлди. Унга кўра, АҚШда ўтадиган Олимпиадада эркаклар ва аёллар ўртасида 8 тадан, жами 16 та вазн тоифаси амал қилиши эълон қилинди. Эслатиб ўтамиз, Париж — 2024 ёзги Олимпия ўйинларида оғир атлетикачилар 5 тадан, жами 10 вазн тоифасида медаллар учун кураш олиб борган эдилар.

Бўлажак дунё биринчилигида Ўзбекистон терма жамоасининг 6 нафар аъзоси қатнашади. Ҳамюртларимиз ўз иштирокларини 10 декабрь кунидан бошлашади.

Манба: Olympic.uz