Афсус, ёшлар ўртасидаги Осиё Ўйинлари Тошкентда ўтказилмайдиган бўлди

2025 йилги Осиё ёшлар ўйинлари Ўзбекистонда ўтказилмайдиган бўлди. Бу ҳақда Осиё Олимпия кенгаши Х ижтимоий тармоғидаги саҳифасида маълум қилди.

"Осиё Олимпия кенгаши Ўзбекистон мезбонлигида Тошкентда ўтказилиши режалаштирилган Ёшлар ўртасидаги 3-Осиё ўйинлари 2025 йилда Баҳрайнда ўтказилишини маълум қилади.

Бугун, 2 декабрь куни ўтказилган ташкилот ижрои қўмитаси йиғилишида бу ҳақдаги қарор қабул қилинди”, дейилади Осиё Олимпия кенгаши расмий ахборотида.

Ушбу мусобақа 9 спорт туридан 43 та мамлакатдан келган 14-17 ёшли спортчилар ўртасида ўтказилиши режалаштирилганди.

Маълумот учун, президент Шавкат Мирзиёев жорий йилнинг 10 сентябрида ушбу ўйинлар ўтказилиши режалаштирилган Олимпия шаҳарчаси қурилиши билан танишганди.

Манба: www.daryo.uz