“Ҳумо” хоккей клуби “Мишкопад” хайрия тадбирини ўтказди

1 февраль куни “Ҳумо” хоккей клуби мунтазам чемпионатнинг сўнгги ўйинини Остона шаҳрининг “Номад” жамоасига қарши ўтказди. “Ҳумо” 3:1 ҳисобида ғалаба қозониб, мухлисларини хурсанд қилди.

Учрашув якунида аренада мухлислар жуда яхши кўрадиган хайрли анъана – Мишкопад, яъни юмшоқ ўйинчоқлар ёмғири бўлиб ўтди. Отилган 1 312 та юмшоқ ўйинчоқ «Ҳумо Арена» муз майдонига тушиб, барча иштирокчиларга унутилмас ҳис-туйғуларни тақдим этди.

Эндиликда ушбу ўйинчоқлар кам учрайдиган оғир ирсий касалликларга чалинган болаларга, Республика болалар ижтимоий мослашуви марказига юборилади. Акция “SMA UMID” ва “ISHONCH” жамғармалари кўмагида ўтказилмоқда.

“Ҳумо” хоккейчилари учун эса мавсумнинг энг муҳим плей-офф босқичи олдинда. Жамоа унда чемпионлик учун курашади.

Манба: stadion.uz