Freestyle Chess. Синдаров ўйин сўнгида Каруанани мағлуб этиш имкониятини қўлдан чиқарди

Германиянинг Вайссенхаус шаҳрида «2025 Freestyle Chess Grand Slam» мусобақасида ҳал қилувчи паллага кирди.

Жавоҳир Синдаров бугун ярим финалнинг илк баҳсини ўтказган бўлса, Нодирбек Абдусатторов 5-8-ўринлар учун ўйинларга киришди.

Синдаров жаҳоннинг учинчи рақамли шахматчиси Фабиано Каруанага қарши қора доналарда ўйнади. Шахматчилар бутун ўйин давомида юқори аниқлик намойиш этишди ва ўйин охирига қадар тенглик сақланиб турди. 46-юришда эса АҚШлик шахматчи пиёда билан жуда ноаниқ юришни амалга оширди. Аммо ҳамюртимиз ўйинни ғалабага олиб борувчи йўлни топа олмади. Бунга эса, албатта, вақт камлиги сабаб бўлган бўлиши мумкин. Натижада томонлар дурангга имзо чекишди. Жавоҳир эртага оқ доналарда ўйнайди.

Нодирбек Абдусатторов бугун франциялик Алиризо Фирузжага қарши оқ доналарда ўйнади. 15-юришга келиб компьютер ўзбекистонлик спортчининг ғалаба қозониш имкониятини юқори баҳолаётган эди. Аммо бир нечта ноаниқ юришлар туфайли 25-юришга келиб вазият тенглашиб қолди. 43-юришга келиб томонлар дурангга имзо чекишди. Гроссмейтерлар ўртасида эртага жавоб ўйини ўтказилади.

Дарвоқе, ярим финалнинг иккинчи ўйинида Винсент Кеймер, кутилмаганда, Магнус Карлсенни мағлубиятга учратди.

Эслатиб ўтамиз, мусобақанинг мукофот жамғармаси — 750.000 долларга тенг. Ғолиб шахматчига 200.000 доллар берилади.

Манба: stadion.uz