Freestyle Chess. Абдусатторов Фиружани мағлуб этди, Синдаров - Каруана баҳсида тай-брек ўйналади
Нодирбек Абдусатторов мусобақанинг 5-ўрни учун курашиш имкониятига эга бўлиш мақсадида франциялик Алиризо Фирузжага қарши бугун қора доналарда ўйнади. Партия ўрталаридан бошлаб устунлик рақиб томонига ўта бошлади. Аммо ўйин сўнгида Фирузжа цейтнотга тушгани учун бўлса керак, хатоларга йўл қўя бошлади. Нодирбек эса бундан усталик фойдаланиб, ғалабани илиб кетди. Эслатиб ўтамиз, ушбу шахматчилар ўртасидаги кечаги ўйин дуранг билан якунланган эди.
Абдусатторов бешинчи ўрин учун Хикару Накамура ва Гукеш Доммаражу ўртасидаги ўйин ғолибига қарши дона суради. Ушбу шахматчилар ўртасидаги икки ўйиндан кейин ҳисоб ҳозирча тенг. Улар тай-брекда ғолиб номини аниқлашади.
Жавоҳир Синдаров эса бугун Фабиано Каруанага қарши ярим финалнинг иккинчи баҳсини ўтказди. 15-юришда АҚШлик спортчи қўпол хатога йўл қўйди. Жавоҳир вазиятда рақибга тактик зарба бериб, камида битта пиёдани уриб олган ҳолда, рақибнинг мудофаа чизиғини парчалаб, позицион устунликни қўлга киритиши мумкин эди. Мммо ватандошимиз буни кўра олмади.
Кейинги юришларда Фабиано цейтнот ҳолатида бўлишига аниқ юришларни амалга оширган бўлса, Синдаров бир нечта ноаниқ юришлар туфайли Каруана катта устунликни қўлга киритди. Аммо у баҳс сўнгида ғалабага олиб борувчи йўлни топа олмади. Якунда томонлар бир юришни 3 мартадан такрорлашди ва дуранг қайд этилди.
Синдаров ва Каруана ўртасидаги кечаги баҳсда ҳам дуранг қайд этилган эди. Бугун улар тай-брек орқали финалчи номига аниқлик киритишади.
Дарвоқе, ярим финалнинг иккинчи ўйинида Винсент Кеймер бугун Магнус Карлсен билан дуранг ўйнади ва кечаги ғалаба эвазига финалга чиқди.
Эслатиб ўтамиз, мусобақанинг мукофот жамғармаси — 750.000 долларга тенг. Ғолиб шахматчига 200.000 доллар берилади. Финалчи 140.000 долларга эга бўлса, 3-ўрин эгасига 100.000 берилади. 5-ўринни қўлга киритган шахматчи эса 50.000 доллар билан уйга қайтади.
Манба: daryo.uz