Спорт гимнастикаси: 50 ёшли Оксана Чусовитина Германияда совриндорликка эришди

Шу кунларда Германиянинг Котбус шаҳрида спорт гимнастикаси бўйича 2025 йилги жаҳон кубогининг биринчи босқич мусобақалари ўтказилмоқда.

Дунё спорт гимнастикасининг ўнлаб номдор спортчилари, Олимпия ўйинлари ва жаҳон чемпионлари иштирок этаётган баҳсларда ўзбекистонлик спортчилар ҳам ғолиблик учун кураш олиб бормоқда.

Эътиборли жиҳати, мазкур нуфузли мусобақада гимнастика афсонаси, бу йил 50 ёшни қарши олаётган ҳамюртимиз Оксана Чусовитина ўз маҳоратини намойиш этди.

“Лос-Анжелес — 2028” Олимпия ўйинларига муҳим рейтинг очколарини тақдим этадиган йилнинг илк нуфузли мусобақасида Оксана Чусовитина таяниб сакраш дастурида 13.249 балл жамғариб, бронза медалга сазовор бўлди.

Эслатиб ўтамиз, жаҳон кубогининг иккинчи босқич мусобақалари жорий йилнинг 6-9 март кунлари Озарбайжон пойтахти Боку шаҳрида бўлиб ўтади.