Тошкентдаги бокс кечасида Лазизбек Муллажонов WBC камари учун рингга чиқaди

14 ноябрь куни соат 18:00 да Humo Arena спорт мажмуасида йилнинг энг кутилган профессионал бокс кечаси бўлиб ўтади. Кечада бир нечта йирик жанглар ташкил этилиши режалаштирилган. Унда Шаҳрам Ғиёсов, Лазизбек Муллажонов, Алохон Абдуллаев, Озодбек Алиев ва Суҳроб Қаюмов каби ўзбекистонлик боксчилар рингга чиқиши кутилмоқда.

Мусобақа Lift Promotions компанияси томонидан ташкил этилади. Кечанинг асосий жангида Лазизбек Муллажонов иштирок этиши режалаштирилган. Ташкилотчилар маълумотига кўра, у WBC камари учун жанг қилади. Бироқ ҳозирча унинг рақиби эълон қилинмаган.

Шунингдек, Шаҳрам Ғиёсов россиялик боксчи Марк Урвановга қарши баҳс олиб боради. Алохон Абдуллаев эса яна бир ўзбекистонлик боксчи Суҳроб Қаюмов билан рингда тўқнашади. Бундан ташқари, кечада Озодбек Алиев ва россиялик Александр Зубков ўртасидаги жанг ҳам ўтказилиши белгиланган.

Мазкур кечага меҳмон сифатида оғир вазн тоифасида мутлақ жаҳон чемпиони, украиналик Олександр Усик ҳамда иккинчи ўрта вазн тоифасида мутлақ жаҳон чемпиони Теренс Кроуфорд каби боксчилар таклиф этилган.

Манба: daryo.uz