Истанбул-2022. Турсуной Раҳимова чорак финалга чиқди

Туркияда бўлиб ўтаётган бокс бўйича аёллар ўртасидаги жаҳон чемпионатида бугунги жанглар бошланди. Ўзбекистонликлар орасида Турсуной Раҳимова (52 кг.) биринчи бўлиб ўз жангини ўтказди. Унга Украина вакили Татьяна Коб рақиблик қилди.

Украиналик спортчи бутун жанг давомида таваккал қилиб олдинга ташланган бўлса, Турсуной рақибини кутиб олди. Бунда аниқлик ҳамюртимиз томонида бўлди. Шундай бўлса-да, рақиб боксчиси ватандошимизни анча куч сарфлашга мажбур этди. Ҳаттоки, Татьяна учинчи раундда очколар бўйича устунликка ҳам эришди. Ҳакамларнинг барчаси ғалабани Раҳимовага беришди — 5:0 (30-27, 29-28, 29-28, 29-28, 30-27).

Шу тариқа, Турсуной Раҳимова жаҳон чемпионатининг чорак финалга чиқди. У ярим финал йўлланмаси учун таиландлик боксчига қарши рингга кўтирилади.

Бугун яна 4 нафар ҳамюртимиз нимчорак финал жангини ўтказишади.

Манба: stadion.uz