Қариндошларининг сўзларига кўра, тишни даволаш вақтида қизчанинг аҳволи кескин ёмонлашган: унинг нигоҳида ўзгариш кузатилиб, нафас олиши қийинлашган. Боланинг онаси вазиятдаги ўзгаришни сезиб, шифокордан тез ёрдам чақиришни сўраган. Бироқ қизчанинг холасининг таъкидлашича, стоматолог аҳволи ўтиб кетишини айтиб, муолажани давом эттирган.

Қариндошларидан бири ижтимоий тармоқларда ёзишича, охир-оқибат тез ёрдамни қўшни хонада ишлаётган ҳамшира чақирган. Бу вақтга келиб, бола ҳушидан кетган ва оғзидан кўпик кела бошлаган. Аёлнинг айтишича, стоматолог томонидан тиббий ёрдам кўрсатилмаган.

Қариндошининг таъкидлашича, шифохонага олиб кетилаётганда қизчанинг юраги тўхтаб қолган. Тиббиёт муассасасида ҳам юрак фаолияти яна бир бор тўхтаган.

Павлодар вилояти соғлиқни сақлаш бошқармаси боланинг аҳволи ўта оғир эканини тасдиқлади.

«2023 йилда туғилган қизча 21 октябрь куни шифохонага ўта оғир аҳволда олиб келинган. У қабул бўлимини четлаб ўтиб, дарҳол реанимация бўлимига ётқизилган. Бола ўпкани сунъий вентиляция қилиш аппаратига уланган, жадал даволаш чоралари кўрилмоқда», — дейилади идора хабарда.

Даволашнинг кейинги тактикасини белгилаш учун мутахассислар Она ва болалик миллий илмий маркази ҳамда Миллий кардиожарроҳлик илмий маркази экспертлари билан телемедицина орқали маслаҳатлашган.

Стоматология клиникасида юз берган воқеанинг барча тафсилотларини аниқлаш мақсадида ички текширув ўтказилаётгани маълум қилинди.

«Тиббий ёрдам сифати ва беморлар хавфсизлиги клиникамизнинг асосий устувор йўналишларидир. Барча муолажалар тиббий протоколларга қатъий мувофиқ равишда амалга оширилади. Ҳозирда воқеанинг холис ҳолатлари ва сабабларини аниқлаш учун расмий текширув ўтказилмоқда», — дейилади муассаса вакиллари баёнотида.

Клиникада текширув якунланмагунча ходимларнинг айбдорлиги ҳақида хулоса чиқаришга эрта экани ҳам таъкидланди.

Вилоят соғлиқни сақлаш бошқармаси маълумотига кўра, воқеа ҳолатларини ҳуқуқни муҳофаза қилувчи органлар ўрганмоқда. Текширув якунлари бўйича ҳуқуқий баҳо берилади. Шунингдек, клиника давлат буюртмаси доирасида тиббий хизмат кўрсатиши қайд этилди.

Ҳозирда қизча реанимация бўлимида қолмоқда. Унинг аҳволи кескин ёмонлашишига олиб келган ҳолатлар ва воқеа сабаблари аниқланмоқда.