Николас Мадуро АҚШ судида ҳимояси учун машҳур Жулиан Ассанжнинг адвокатини ёллади
АҚШ Адлия вазирлиги Николас Мадурони наркотерроризмда айбламоқда. Айбловга кўра, у ноқонуний наркотик гуруҳлар билан ҳамкорлик қилган, шунингдек, рафиқаси Силия Флорес билан бирга кокаинни АҚШ ҳудудига ноқонуний олиб кириш ва қурол-яроқ билан боғлиқ жиноятларда иштирок этган. Мадуро мазкур айбловлар қўйилган пайтда Венесуэла президенти лавозимида бўлган.
26-қаватда ўтган суд мажлисида улар ўзларини айбсиз деб эълон қилди. Маълумотларга кўра, Мадуро ва Флорес шанба куни тонгда Каракасда ўтказилган ҳарбий операция давомида қўлга олинган ва АҚШга олиб келинган.
Суд мажлисида Барри Поллак АҚШ округ судьяси Элвин Хеллерштейнга Мадуро номидан «ҳажман катта ва мураккаб» илтимосномалар киритилишини маълум қилди. Адвокат айбловлар асоси ҳамда қўлга олиш жараёни қонунийлигига эътироз билдиришини таъкидлади.
Поллак судда Мадуро суверен давлат раҳбари эканини, шу мақомга тегишли имтиёз ва дахлсизлик ҳуқуқларига эга эканини билдирди. Шунингдек, у Мадурони ҳарбий йўл билан қўлга олиш қонунийлиги масаласи ҳам кўтарилишини қайд этди.
Айни кунда Венесуэлада Делси Родригес вақтинчалик президент сифатида қасамёд қилгани маълум қилинди.
Барри Поллак Harris St. Laurent & Wechsler LLP юридик фирмасида фаолият юритади. У миллий хавфсизликка оид ишларда катта тажрибага эга бўлиб, Жулиан Ассанж иши доирасида ҳам ҳимоя гуруҳи таркибида иштирок этган. Ассанж 2024 йил ёзида айбини қисман тан олиб, олти йиллик суд жараёни якунланган эди.
Поллак шунингдек, собиқ CIA ходими Жеффри Стерлингни ҳам ҳимоя қилган. У давлат сирларини ошкор этганликда айбланиб, судланган эди. Юристнинг мазкур тажрибаси Мадуро ишида махфий маълумотлар билан боғлиқ жараёнларда муҳим аҳамият касб этиши мумкин.
Маълум қилинишича, Поллакка гонорар тўлаш учун АҚШ Молия вазирлигидан махсус рухсат талаб этилиши мумкин, чунки Мадуро ва Венесуэла ҳукуматига нисбатан санкциялар жорий этилган.
Мадуронинг рафиқаси Силия Флоресни эса Техас штатида фаолият юритувчи, илгари 12 йил давомида федерал прокурор бўлган адвокат Марк Доннелли ва унинг ҳамкори Андрес Санчес ҳимоя қилмоқда.