Олий Мажлисда ОАВда муҳокамага сабаб бўлган масалалар юзасидан амалдорларнинг ахборотини эшитиш жорий этилади

Олий Мажлис палаталарининг қўмиталари томонидан ОАВ ва ижтимоий тармоқларда кенг муҳокамага сабаб бўлган масалалар юзасидан давлат органлари раҳбарлари ахборотини эшитиш бўйича қонун лойиҳаси ишлаб чиқилиши мумкин. Бу ««Маҳаллани ривожлантириш ва жамиятни юксалтириш» йилида устувор йўналишлар бўйича ислоҳотлар дастурлари ва «Ўзбекистон — 2030» стратегиясини амалга ошириш бўйича Давлат дастури тўғрисида»ги президент фармони лойиҳасида кўзда тутилган.

Қонун лойиҳасида Олий Мажлис палаталарининг қўмиталари томонидан давлат органлари раҳбарларининг ахборотини эшитиш бўйича тадбирлар нафақат амалдаги қонунчиликда келтирилган асослар, балки жамоатчилик эътиборини тортган, оммавий ахборот воситалари ва ижтимоий тармоқларда кенг муҳокамага сабаб бўлган масалалар юзасидан ҳам ўтказилиши мумкинлигини белгилаш назарда тутилади.

Бундан ташқари, Олий Мажлис палаталарининг қонун ижодкорлиги жараёнига, шу жумладан, маълумотларни, қонунчилик ҳужжатларини, хорижий давлатлар тажрибасини таҳлил қилишда сунъий интеллект технологияларини жорий этиш чораларини кўриш. Бунда:

• ривожланган хорижий давлатлар амалиётини ўрганиш;
• сунъий интеллект технологияларини жорий этишнинг ҳуқуқий ва институционал асосларни яратиш;
• инфратузилма ва технологияларни тайёрлаш;
• кадрлар салоҳиятини ошириш;
• сунъий интеллект асосидаги дастурий ечимларни яратиш;
• тажриба (пилот) лойиҳаларини амалга ошириш назарда тутилади.