Тошкентда 500 минг доллардан ортиқ айланмага эга наркошоплар фош этилди
Тошкент шаҳар ИИББ маълумотига кўра, жиноий гуруҳлар кенг қамровли рақамли инфратузилма қурган. Аккаунтларни рўйхатдан ўтказиш учун хорижий телефон рақамларидан фойдаланилган, ҳисоб-китоблар эса криптоҳамёнлар ва номаълум банк карталари орқали амалга оширилган.
Аниқланган ресурслар ичида энг йирикларидан бири — аудиторияси 14 мингдан ортиқ фойдаланувчига эга Telegram-бот бўлган. Тергов маълумотларига кўра, 23–24 ёшдаги икки нафар шахс ушбу ресурс орқали қарийб 10 мингта битим амалга оширган ва жами 443 минг доллар миқдордаги наркотик моддаларни сотган. Улар хизматни кенгайтириш мақсадида шаҳар бино ва иншоотларида граффити-реклама ҳам жойлаштириб келишган.
Оператив чора-тадбирлар доирасида яна бир нечта тармоқлар ҳам фош этилди. Бир ҳолатда криптовалюта айланмаси тахминан 60 минг доллар бўлган канал администраторлари қўлга олинди. Бошқа ҳолатда эса ўзаро боғланган 29 та Telegram-ботдан иборат тармоқ фаолияти тўхтатилди. Терговда аниқланишича, унинг 22 ёшли ташкилотчиси ўз уйида махсус омборча тайёрлаган: тинтув давомида электрон тарозилар, ўраш материаллари ва таъқиқланган моддалар топилган. Фақатгина тармоққа тегишли ботлардан бирида 800 тадан ортиқ сотув амалга оширилгани маълум бўлди.
Бундан ташқари, тўрт мингга яқин обуначига эга бўлган яна бир бот аниқланди. Унинг администратори олти хил майдончани бошқариб, жами 51 минг доллардан ортиқ қийматдаги наркотик моддаларни сотгани қайд этилди.
Барча ҳолатларда жиноий фаолиятга оид электрон далиллар сақланган мобил қурилмалар, шунингдек, йирик миқдордаги таъқиқланган моддалар мусодара қилинди. Барча фигурантлар ушланиб, амалдаги қонунчиликка мувофиқ жавобгарликка тартибда тортилишлари белгиланди.