Фарғона вилоятида 2 млрд сўмлик олтинни олиб чиқиб кетишга уринишнинг олди олинди
Ўзбекистон Давлат хавфсизлик хизмати маълум қилишича, операция божхона органлари ходимлари билан ҳамкорликда қўшни давлатга чиқиш амалга ошириладиган чегара постларидан бирида ўтказилган.
Текширув учун Фарғона туманида яшовчи шахс бошқараётган Daewoo Damas автомобили тўхтатилди. Кўрик давомида автомобиль кузови ичида яширилган, ностандарт шаклдаги тўртта олтин қуймаси аниқланди.
Олиб қўйилган қуймалар ашёвий далил сифатида расмийлаштирилди. Экспертиза натижасига кўра, уларнинг соф вазни 1 килограмм 232 граммни ташкил этган, умумий қиймати эса 2 млрд 182 млн 466 минг сўм деб баҳоланмоқда.
Мазкур ҳолат юзасидан Жиноят кодексининг 182-моддаси 2-қисми «а» банди — божхона қонунчилигини бузиш бўйича жиноят иши қўзғатилди.
Ушбу модда санкцияларига кўра, 300 дан 600 тагача базавий ҳисоблаш миқдорида жарима, уч йилгача ахлоқ тузатиш ишлари ёки беш йилдан саккиз йилгача озодликдан маҳрум қилиш жазоси қўлланилиши мумкин.
Аввалроқ Навоий вилоятида ҳам ҳуқуқни муҳофаза қилувчи органлар 15,55 млрд сўмлик ноқонуний олтин қазиб олиш ҳолатини аниқлаган эди.