Ўзбекистонда лимон боғлари ташкил этиш учун субсидиялар жорий этилади

Ўзбекистонда янги лимон боғларини барпо этиш ва кўчатлар сотиб олиш билан боғлиқ харажатлар давлат субсидиялари ҳисобидан қисман қопланади.

Белгиланган тартибга мувофиқ, субсидия миқдори лимон плантациялари барпо этиш учун фойдаланиладиган ҳар бир сотих ер учун 300 минг сўмгача бўлади.

Молиявий қўллаб-қувватлаш ишлар якунланганидан кейин тақдим этилади. Хусусан, лимон боғлари фойдаланишга топширилгандан сўнг ва туман ишчи комиссиясининг тегишли далолатномалари Боғдорчилик ва иссиқхона хўжалигини ривожлантириш агентлигига тақдим этилгандан кейин бир ой муддат ичида субсидия ажратилади.

Кутилишича, мазкур чора боғдорчиликни ривожлантиришни рағбатлантиради, цитрус мевалар ишлаб чиқариш ҳажмини оширади ҳамда мамлакат фермер хўжаликларини қўллаб-қувватлайди.