АҚШ Сенати Кевин Уоршни Федерал захира тизими раҳбари этиб тасдиқлади
Сенатдаги овоз беришдан сўнг, президент Уоршнинг тўрт йиллик ваколат муддатини тасдиқлаши керак бўлади.
56 ёшли Уорш, катта эҳтимол билан, келаси ҳафта Жером Пауэллнинг ўрнини эгаллайди. У нархлар кескин ошаётган, инфляциянинг шиддат билан ўсишига юз тутган иқтисодиёт билан тўқнаш келади.
Уорш билан 2011 йилдан бери бирга ишлаб келаётган миллиардер инвестор Стенли Дракенмиллер FT билан суҳбатда унинг «ўта масъулиятли бир даврда» иш бошлаётганини, хусусан, 2021 йил бошидан бери 2 фоизлик инфляция таргет кўрсаткичига эриша олмаган ФЗТни мерос қилиб олаётганини таъкидлаган. Унинг қўшимча қилишича, уруш ва сунъий интеллектнинг жадал ривожланиши фонида иқтисодиёт «ноаниқлик»дан азият чекаётган бир пайтда Уорш ФЗТни бошқаришга «ортиғи билан қодир» бўлади. Айни пайтда у яқин ойларда марказий банк фоиз ставкаларини ошириши ёки пасайтириши ҳақида фикр билдиришдан бош тортган.
Трампнинг ФЗТ олдига қўйган асосий масалаларидан бири — фоиз ставкасини пасайтириш. У буни ФЗТнинг аввалги раҳбари Жером Пауэллдан ҳам талаб қилган эди. CNN’нинг ёзишича, Уорш бу масалада АҚШ президентига яқинроқ ҳисобланади.
Бироқ Уорш Эрон билан уруш туфайли инфляция босими кучайиб бораётган бир пайтда лавозимга киришмоқда. Инвесторлар ФЗТ йил охиригача асосий ставкани ўзгаришсиз қолдиришини ёки инфляция кучайса, уни ҳатто оширишини кутмоқда, бу эса Трампнинг норозилигига сабаб бўлади.
Уорш лавозимга киришишидан олдин ўзига тегишли 130 миллион доллардан ортиқ активларнинг катта қисмини сотиш мажбуриятини олди, деб ёзади FT. Молиявий операциялар якунлангач, у қасамёд қилади. Пауэллнинг раислик муддати 15 май куни расман тугайди, бироқ у Уорш лавозимига киришгунга қадар бу вазифани вақтинча бажариб туриши мумкин.
Уоршнинг номзодини тасдиқлаш жараёни Трампнинг марказий банк мустақиллигига қарши таҳдидлари сабабли кечикишлар билан кечди. Хусусан, январь ойида АҚШ Адлия вазирлиги ФЗТга Катта ҳакамлар ҳайъати чақирув қоғозини топшириб, Жером Пауэллга нисбатан жиноий айблов эълон қилиш билан таҳдид қилганди.
Шимолий Каролинадан республикачи сенатор Том Тиллис Адлия вазирлиги ФЗТ штаб квартирасининг 2,5 миллиард долларлик таъмири юзасидан Пауэлл берган кўрсатмаларга оид жиноий терговни тўхтатмагунича Уоршни қўллаб-қувватлашдан бош тортди. Шунингдек, у Адлия вазирлиги расмийлари ФЗТ бош инспектори асосли далилларни тақдим этмагунча терговни қайта очмасликларини айтмагунча, номзоднинг тасдиқланишига тўсқинлик қилди.
Пауэлл ҳар қандай қонунбузарликни рад этган. ФЗТ раиси ҳам, Тиллис ҳам бу терговни марказий банкка қарз олиш харажатларини камайтириш учун босим ўтказиш воситаси сифатида кўрган.
Шунингдек, март ойида АҚШ суди Трамп маъмурияти томонидан Жером Пауэллга қўйилаётган айбловларни асоссиз деб топган ва ФЗТга юборилган чақирув қоғозларини тўхтатиб қўйган эди. Колумбия округи федерал судьяси Жеймс Боасберг 13 март куни эълон қилинган суд хулосасида ёзишича, прокурорлар ФЗТ штаб-квартирасини таъмирлаш бўйича текширувдан Пауэллни Трампнинг асосий фоиз ставкасини пасайтириш ҳақидаги тинимсиз чақириқларига бўйсундириш учун восита сифатида фойдаланган.
Уолл-стритнинг етакчи молиячилари бу лавозим учун узоқ вақтдан бери фаворит саналган шахс — Трампнинг иттифоқчиси ва Миллий иқтисодий кенгаш директори Кевин Ҳассетнинг номзодидан хавотир билдирганидан сўнг, президент январь ойи охирида Уоршни танлаганини эълон қилганди.
Бир неча ой давом этган суҳбатлар давомида ФЗТнинг собиқ раҳбари Уорш марказий банк балансини, унинг жамоатчилик билан алоқа усулларини ва Ғазначилик билан муносабатларини ислоҳ қилишни таклиф қилиб, тизимни ўзгартиришга номзод сифатида майдонга чиқди.
Бироқ Трамп маъмуриятининг Пауэлл ва ФЗТ раҳбари Лиза Кукка қарши ҳужумлари кескин муҳит яратган ташкилот ичида Уорш ўзи режалаштирган ислоҳотлар учун қўллаб-қувватлашга эришишда қийинчиликларга дуч келиши мумкин, дейди FT.
Пауэлл ўзининг раис сифатидаги сўнгги матбуот анжуманида Адлия вазирлиги унга қарши терговни қайта бошлаши эҳтимоли узил-кесил йўқолгунча Бошқарув кенгашида қолишини маълум қилганди. Таҳлилчиларнинг фикрича, ФЗТ кенгашида Трампнинг одами учун яна бир ўрин очилиши марказий банк мустақиллигига қўшимча таҳдид туғдиради.